Գեղարքունիքի մարզի Նորատուս համայնքում եւ Գավառ քաղաքում ոստիկանները խիստ հսկողություն են իրականացնում. իրավիճակը հանդարտ է։ Այս մասին NEWS.am-ին հայտնեցին Գավառի քաղաքապետարանի լրատվության բաժնից։

«Հիմա վիճակը լավ է. Ոստիկանություն – համայնքապետարան համագործակցության արդյունքում իրավիճակը խաղաղ է, խուճապ չկա։ Քաղաքի կենտրոնական հատվածներում են խիստ հսկողություն են իրականացվում։ Ոստիկանները հսկում են նկատելի կերպով, որպեսզի քաղաքացիները լինեն զգոն լինեն»,- ասացին քաղաքապետարանից։

Նորատուսի համայնքապետարանից NEWS.am-ին հայտնեցին, որ իրավիճակն այս պահին խաղաղ է, բնակիչներն անցել են բնականոն կյանքին։

Հիշեցնենք, որ երեկ՝ ապրիլի 28-ին, Գավառ քաղաքում փոխհրաձգություն է տեղի ունեցել մի խումբ գավառցի երիտասարդների եւ նորատուսցիների միջեւ։ Կրակոցների հետեւանքով մահացու հրազենային վիրավորում է ստացել քննիչ Զորիկ Պարոնիկյանը եւ Նորատուս համայնքի բնակիչ՝ «Նորատուսցի արջ» մականունով երիտասարդը։ Վիրավորում են ստացել եւս 4 քաղաքացի, որոնցից 2-ը տեղափոխվել էին Երեւանի հիվանդանոցներից մեկը, իսկ 2-ը տեղափոխվել էին Գավառի հիվանդանոց։

Սակայն դեպքն այսքանով չի ավարտվել։ Տեղի է ունեցել դաժան վենդետա, և դա այն դեպքում, երբ ոստիկանապետ Արման Սարգսյանն անձամբ եղել է դեպքի վայրում, ոստիկանությունը փաստորեն չի կարողացել վերահսկել իրավիճակը։ Դանակներով զինված անձինք մտել են Գավառի հիվանդանոց, որտեղ այդ ժամանակ հսկողություն էին իրականացնում ոստիկանական ուժերը, հիվանդանոցում գտնվողներից երկուսի կոկորդը կտրել, մեկին՝ ծեծի ենթարկել։ Դրանից հետո նշված անձինք կարողացել են հեռանալ հիվանդանոցից։ Փաստորեն, ոստիկանները չեն կարողացել ոչ միայն կանխել հանցագործությունը, այլև ձերբակալել հանցագործությունը կատարողներին։ Ոստիկանությունը մյուս կողմից հայտարարում է, որ ոստիկանապետը եղել է հնչած կրակոցների դեպքի վայրում՝ Ազատության պողոտայում։ Մեր տեղեկություններով՝ 2 քաղաքացիները, որոնց կոկորդը կտրել են, հարազատ եղբայրներ են. նրանցից մեկի անունը Արմեն է, մյուսինը՝ Խաչիկ։ Վիրավորներից մի քանիսին տեղափոխել են Երևան, նրանցից մեկի վիճակը մեր տեղեկություններով միջին ծանրության է, մյուս երկուսինը՝ ծայրահեղ ծանր։ 

Հարուցված քրեական գործի շրջանակում կատարվում է նախաքննություն:

Ինչպես կրակոցներով, այնպես էլ դրան հաջորդած դեպքերով կան բերման ենթարկվածներ։

Վենդետա Գավառում. ոստիկանական պատնեշը ճեղքելով՝ մտել են հիվանդանոց ու կտրել վիրավորներից երկուսի կոկորդը (լրացված)