նախընտրելի դարձնել
Երեքշաբթի իսրայելցի հնագետները ցուցադրել են հռոմեական դարաշրջանի 1900-ամյա հազվագյուտ եւ զարմանալիորեն լավ պահպանված մետաղադրամ՝ Լուսնի աստվածուհու պատկերով․ սա իր տեսակի մեջ առաջին գտածոն է իսրայելական ջրերում, գրում է AFP-ն:
Ալեքսանդրիայում (ներկայիս Եգիպտոսում - խմբ.) հատված մետաղադրամը, որի վրա Լուսնի տակ կենդանակերպի Խեցգետին նշանն է, իսկ մյուս կողմից՝ հռոմեական կայսր Անտոնինոս Պիուսը, երկրի հյուսիսում Հայֆայի ափերի մոտ հետազոտությունների ժամանակ հայտնաբերել են Իսրայելի հնությունների վարչության հնագետները։
Այն թվագրվում է «ութերորդ տարվան», ինչը նշանակում է 138-ից մինչեւ 161 թվականը Անտոնինոս Պիուսի կառավարման ութերորդ տարին, այդ ժամանակահատվածը մի մասն է Pax Romana կոչվող դարաշրջանի, որի ընթացքում Հռոմեական կայսրությունը համեմատաբար խաղաղ է եղել։
Մետաղադրամը 13 մետաղադրամների շարքի մի մասն է, որոնց օրինակները հայտնաբերվել են աշխարհի այլ վայրերում, որտեղ պատկերված են Կենդանակերպի 12 նշանները եւ Կենդանակերպի ամբողջական անիվը:
«Առաջին անգամ է նման մետաղադրամ հայտնաբերվում Իսրայելի ափերի մոտ»,- ասել է Իսրայելի հնությունների վարչության ծովային հնագիտության բաժնի ղեկավար Ջեյկոբ Շարվիտը:
