«Թրամփի նախագիծ»՝ այսպես է կոչվում Ջո Բայդենի վարչակազմի կողմից մշակված ծրագիրն այն դեպքի համար, եթե Դոնալդ Թրամփն առաջադրվի 2024 թվականի նախագահական ընտրություններում։

Թրամփը նախօրեին հայտարարել էր նախագահական մրցարշավին մասնակցելու իր ծրագրի մասին։ Արեւմտյան թեւում նախագահի խորհրդականների մի փոքր խումբ ծրագիր է մշակել, թե ինչպես Բայդենը եւ Սպիտակ տունը արձագանքեն նրան, ինչին սպասում են՝ նախկին նախագահի կողմից իր թեկնածությունը պաշտոնապես հայտարարելուց հետո վիրավորանքների տարափին, գրում է New York Times-ը:

Բայդենը կշարունակի ընդգծել իր համոզմունքը, որ Թրամփը սպառնալիք է ժողովրդավարության համար, ասել են խորհրդականները։ Բայց նրա քաղաքական խորհրդատուները վճռական են ցույց տալու, որ Թրամփի կառավարման չորս տարիները ոչ մի իրական ձեռքբերում չեն բերել ամերիկացի ժողովրդին:

Երեքշաբթի օրը Թրամփի հայտարարությունից մի քանի ժամ առաջ Բայդենի քաղաքական թվիթերյան էջը հրապարակել է տեսանյութ, որը ծաղրում է երկրի քայքայվող ենթակառուցվածքի հետ կապված գործողությունների մասին նախկին նախագահի հայտարարությունները: «Բառերի եւ գործողությունների միջեւ տարբերություն» վերնագրված տեսանյութում երեւում է, որ Բայդենը ստորագրում է ենթակառուցվածքի մասին իր 1 տրիլիոն դոլար արժողությամբ օրենքը, ինչպես նաեւ տեսահոլովակների ընտրանի, որտեղ նախկին նախագահը օգտագործում է «ենթակառուցվածք» բառը:

Թրամփի ելույթի մեջտեղում թվիթերյան միկրոբլոգում տեղադրվել է մեկ այլ տեսանյութ՝ «Դոնալդ Թրամփը խայտառակեց Ամերիկային» վերնագրով, որտեղ ցուցադրվում են 2021 թվականի հունվարի 6-ին Կապիտոլիումի բլրի վրա տեղի ունեցած անկարգությունների տեսարանները։

Թրամփին պատասխանները համակարգելու ջանքերը ամիսների հետազոտություն են պահանջել, եւ այն ղեկավարում են Բայդենի հաղորդակցության առաջատար ստրատեգներից Անիտա Դանը եւ Յան Օ՛Մալլի Դիլոնը, որը ղեկավարել է Բայդենի 2020 թվականի քարոզարշավը եւ այժմ Սպիտակ տան աշխատակազմի ղեկավարի տեղակալն է։

Անցյալ շաբաթ Բայդենը հայտարարել է, որ «մտադիր է» առաջադրվել 2024 թվականին, բայց կխոսի իր ընտանիքի հետ՝ նախքան հաջորդ տարվա սկզբին որոշման մասին հայտարարելը։

Այնուամենայնիվ, պաշտոնյաներն ասել են, որ ընտրություններում Թրամփի ներկայությունը կխրախուսի նրան կրկին առաջադրվել: Բայդենն իր նախորդին համարում է վտանգ, որին պետք է կանգնեցնել։ Նա պարբերաբար նշում է, որ ինքը միակ մարդն է, որը երբեւէ հաղթել է Թրամփին՝ ակնարկելով, որ ինքը կրկին դա անելու ավելի մեծ հնարավորություն կունենա։ Նա հրապարակայնորեն հայտարարել է, որ «չի հիասթափվի», եթե մատչ-ռեւանշում հանդիպի Թրամփի հետ։

Բայդենին ոգեւորել են միջանկյալ ընտրություններում դեմոկրատների սպասվածից ավելի բարձր արդյունքները։ Բայց նրա վարկանիշը շարունակում է ցածր մնալ՝ըստ հարցումների, եւ բախվում է քաղաքական հանդիպակաց քամիների՝ գնաճից տառապող տնտեսություն, Եվրոպայում խորացող պատերազմ եւ իր ծեր լինելու մասին մշտական հարցեր։