Նախընտրելի
Վենեսուելայի նախագահ Նիկոլաս Մադուրոն կոչ է արել ԱՄՆ հանրությանը աջակցել Վենեսուելային՝ Ամերիկայում խաղաղության համար ԱՄՆ ռազմական գործողության ֆոնին։ Նա այս հայտարարությունն արել է CNN-ին Կարակասում կայացած հանրահավաքի ժամանակ։
«[Ես կոչ եմ անում ԱՄՆ հանրությանը] միավորվել խաղաղության համար [Ամերիկայում], բավական են անվերջ պատերազմները, բավական են անարդար պատերազմները, բավական են Լիբիան եւ Աֆղանստանը»,- իսպաներեն ասել է նա CNN-ի թղթակցին։ CNN-ը ավելացրել է, որ Վենեսուելայի նախագահը նաեւ ուղերձ է թողել ԱՄՆ նախագահ Դոնալդ Թրամփին անգլերեն. «Այո, [խնդրում եմ], խաղաղություն»։ Հեռուստաալիքի տվյալներով՝ Մադուրոն հրաժարվել է պատասխանել այն հարցին, թե արդյոք մտահոգված է ԱՄՆ հնարավոր ագրեսիայից՝ նշելով, որ կենտրոնացած է իր երկիրը խաղաղ կառավարելու վրա։
Ինչպես օգոստոսին հաղորդել էր The New York Times-ը, Թրամփը ստորագրել է գաղտնի հրահանգ՝ լատինաամերիկյան թմրակարտելների դեմ ռազմական ուժի կիրառում սկսելու համար։ Դրանից հետո Կարիբյան ավազանում տեղակայվել են ԱՄՆ լրացուցիչ ռազմական ստորաբաժանումներ։ Այնուհետեւ Վաշինգտոնը սկսել է ավիահարվածներ հասցնել այն նավակներին, որոնք, ԱՄՆ կառավարության խոսքով, ԱՄՆ թմրանյութեր են տեղափոխում Կարիբյան ավազանով Խաղաղ օվկիանոսի արեւելքով։
CNN-ի տվյալներով՝ վերջին ամիսներին ԱՄՆ ուժերը թմրանյութերի մաքսանենգության դեմ պայքարի պատրվակով Լատինական Ամերիկայի ափերի մոտ ոչնչացրել են մոտ 20 նավակ, որի հետեւանքով զոհվել է մոտ 80 մարդ։ Այս հարվածներից առնվազն մեկից հետո Կոլումբիայի նախագահ Գուստավո Պետրոն պնդել է, որ ամերիկյան գործողության արդյունքում սպանվել է ր երկրի ձկնորս, այլ ոչ թե թմրանյութերի առեւտրով զբաղվող։ ԱՄՆ վարչակազմը հրաժարվում է բացահայտել մանրամասներ այն մասին, թե ում է թիրախավորում հարվածելիս։
Մադուրոն բազմիցս հայտարարել է, որ Վենեսուելան բախվում է վերջին 100 տարվա ընթացքում ԱՄՆ ներխուժման ամենալուրջ սպառնալիքին։ Վաշինգտոնը մեղադրում է Վենեսուելայի իշխանություններին թմրանյութերի ապօրինի շրջանառության դեմ պայքարում բավականաչափ նախաձեռնողական չլինելու մեջ։ The New York Times-ի տվյալներով՝ Թրամփը լիազորել է ԿՀՎ-ին գաղտնի գործողություններ անցկացնել Վենեսուելայում։
Ամերիկյան լրատվամիջոցները բազմիցս հաղորդել են, որ ԱՄՆ-ը շուտով կարող է սկսել հարվածներ հասցնել Վենեսուելայում թմրակարտելների օբյեկտներին։ Սակայն հոկտեմբերի 31-ին Թրամփը հայտարարել է, որ չի քննարկում Վենեսուելայի տարածքին հարվածելու հնարավորությունը։
