Հակասահմանադրական ճանաչված հոդվածով դատական նիստը մոտ երկու ժամ քննարկել է նիստերի ժամանակացույցը։

Ավելի վաղ դատավոր Սարգիս Պետրոսյանը հայտարարել էր, որ ելնելով օրենսդրական փոփոխություններից և ստացված շրջաբերականից՝ նիստերը կանցկացվեն ավելի հաճախ, քան առնվազն շաբաթը մեկ անգամ։ Այդ նորությունը երկարատև քննարկումների առիթ է դարձել։

Պաշտպանական կողմը և գործով անցնող անձինք իջեցված շրջաբերականը գնահատել են որպես ճնշում դատարանի վրա։ Մասնավորապես, նման կարծիք է հայտնել ՀՀ երկրորդ նախագահ Ռոբերտ Քոչարյանը։

Յուրի Խաչատուրովի փաստաբան Միհրան Պողոսյանը նկատել է, որ ժամկետները «խախտված են» ի սկզբանե, և արդեն 7 տարի ընթանում է անհիմն դատական գործընթաց։

Դատավորը հայտարարել է, որ ներկայիս տեմպերով դատավարությունը կշարունակվի ևս 7 տարի, և սպառնացել, որ եթե չհաջողվի պայմանավորվել նիստերի ժամանակացույցի շուրջ, դատարանն ինքնուրույն որոշում կկայացնի։

Արմեն Գևորգյանը նույնպես մատնանշել է կատարվողի քաղաքական ենթատեքստը և ենթադրել, որ ընտրությունների համատեքստից ելնելով՝ գործընթացն արագացնելու փորձեր են արվում։ Ի պատասխան դատավորը նկատել է, որ նույնիսկ եթե նիստերն անցկացվեն առավոտից երեկո, միևնույն է՝ չենք հասցնի։ Գևորգյանն արձագանքել է՝ ենթադրելով, որ նման համառ քննարկումն այն միտքն է հուշում, թե որոշումն արդեն կայացված է, իսկ մնացածը ձևական բնույթ է կրում։ Ընդհանուր առմամբ, պատգամավորը դատական իշխանության կողմից հստակ վերաբերմունք է տեսնում այս գործընթացի նկատմամբ, որը քաղաքական շոուի տարրեր է պարունակում և ամենևին էլ արդարադատություն չէ։ Դատավորը հիշեցրել է բացարկ ներկայացնելու հնարավորության մասին։ Նա նաև ընդգծել է, որ չի հաջողվի այս գործընթացը տեղավորել սովորական քրեական վարույթի շրջանակներում։ Դատավորը հերթական անգամ հայտնել է, որ ողջամիտ ժամկետները ենթադրում են նիստերի անցկացում առնվազն շաբաթը մեկ անգամ։ Թե երբ կկայանա հաջորդը, դեռ հայտնի չէ։