Քիմբերլի Գիլֆոյլի ժամանումը Հունաստան գրավել է այն ուշադրությունը, որը սովորաբար հատկացվում է փոփ աստղերին կամ վարչապետերին։ Այս ամիս նա հայտնվել է Աթենքի բեմում և ԱՄՆ-ի նորանշանակ դեսպանին հաջողվել է տաբլոիդների ուշադրությունը գրավել դեպի բարձր խաղադրույքներով աշխարհաքաղաքականությունը՝ պաշտպանելով ԱՄՆ-ի կողմից աջակցվող խոշոր էներգետիկ նախագծերը և դիվանագիտական առճակատում հրահրելով Չինաստանի հետ՝ կապված Հունաստանի ամենաստրատեգիական նավահանգիստներից մեկի վերահսկողության շուրջ, գրում է Politico-ն։

Fox News-ի նախկին հաղորդավարուհին և դատախազ Գիլֆոյը, ով ժամանակին ամուսնացած է եղել Կալիֆոռնիայի նահանգապետ Գևին Նյուսոմի հետ և հանդիպել է Դոնալդ Թրամփ կրտսերի հետ, ցնցել է հունական մայրաքաղաքը վառ հեռուստատեսային ելույթներով և անզիջում դիվանագիտական «մկանների խաղով», գրում է լրատվամիջոցը։

Ինչպես պնդում է Politico-ն, նրա կողմից 2015 թվականին, երբ նա լրագրող էր, հույներին որպես «մակաբույծներ, որոնց պետք է պատժել, ինչպես գորգի վրա միզող շանը» նկարագրելը, մեծ մասամբ, վաղուց մոռացվել է։

Գիլֆոյլը նոյեմբերի 1-ին Աթենք է ժամանել մասնավոր ինքնաթիռով, որը պատկանում է հույն գործարար Էրիկ Վասիլատոսին և անմիջապես ներգրավվել է մեկ շաբաթ տևողությամբ բարձրաստիճան ելույթների մեջ։ Նրա ժամանումից և շքեղ «Սենթրալ» հյուրանոցում պաշտոնական ընթրիքի հաջորդ օրը, նրա սիրելի հույն երգիչ Կոնստանտինոս Արգիրոսը հատուկ միջոցառում է կազմակերպել այն գիշերային ակումբում, որտեղ ինքը ելույթ է ունենում՝ վերջինիս գալուստը նշելու համար։ Նախարարները, բանկիրները և գործարարները շտապել են մասնակցել փոփ աստղի կողմից արված անսովոր հրավերին, պատմում է Politico-ն։

«Ես չեմ հիասթափեցնի ԱՄՆ-ին և Հունաստանին», - ասել է նա՝ հագած փայլուն արծաթագույն զգեստ և մորթյա շարֆ։ Դրանից հետո, ինչպես նշում է լրատվամիջոցը, ԱՄՆ դեսպանը գրկել է բարձրաստիճան հյուրերին և պարել ավանդական հունական ժողովրդական պարեր։

Նրա առաջին պաշտոնական հանդիպումը՝ Հունաստանի նախագահ Կոնստանտինոս Տասուլասին հավատարմագրերի հանձնումը, արագորեն տարածվել է աշխարհով մեկ այն բանից հետո, երբ նա պատմել է, թե ինչպես է բացահայտել Հունաստանը իր մեղրամսի ժամանակ։ «Մեղրամիսը հիասքանչ էր, իսկ հարսանի՞քը», - կատակել է Հունաստանի նախագահը։

Հասարակական արձագանքն ըստ էության համընկել է ակտիվության բռնկման հետ, երբ Գիլֆոյլն օգտագործել է իր դեսպանական լիազորությունները՝ Վաշինգտոնի և Աթենքի միջև մի շարք գործարքներ կնքելու համար։ Պաշտոնավարման առաջին շաբաթվա ընթացքում Հունաստանը համաձայնագիր է ստորագրել ամերիկյան «ExxonMobil» էներգետիկ հսկայի հետ՝ օֆշորային հորատումներ սկսելու համար, որը երկրում նմանատիպ առաջին նախագիծն է (ավելի քան 40 տարվա ընթացքում)։ Նախագծին մասնակցել են ԱՄՆ ներքին գործերի նախարար Դագ Բուրգումը և էներգետիկայի նախարար Քրիս Ռայթը, ինչը վկայում է կլիմայի փոփոխության վերաբերյալ ԵՄ գործողությունների ծրագրերից Աթենքի հրաժարվելու մասին։

Մի քանի օր անց Աթենքը և Կիևը գործարք են կնքել ԱՄՆ-ից հեղուկ բնական գազ (ՀԲԳ) ներմուծելու վերաբերյալ, որով փորձում են օգնել Ուկրաինային ձմեռային կարիքները բավարարելու համար, ինչը Հունաստանը դարձրել է ԵՄ առաջին երկիրը, որն անմիջականորեն ներգրավվել է ռուսական գազի «յուրաքանչյուր վերջին մոլեկուլը» ամերիկյան ՀԲԳ-ով փոխարինելու Վաշինգտոնի ջանքերին։

Գործարքը կնքվել է Ուկրաինայի նախագահ Վլադիմիր Զելենսկու այցի ժամանակ։ Գիլֆոյլը ներկա է եղել ստորագրմանը և կանգնած է եղել վարչապետ Կիրիակոս Միցոտակիսի և Զելենսկու միջև պաշտոնական լուսանկարի համար՝ ընդգծելով որոշման կայացման գործում ԱՄՆ-ի դերը։

Նա իր առաջնահերթություններն ավելի հստակ է ներկայացրել դեսպանատանը քաղաքական և գործարար առաջնորդների հետ ընթրիքի ժամանակ. «Եթե դուք ՀԲԳ գնեք մեզնից, ես ձեզ նորից կհրավիրեմ։ Հակառակ դեպքում... դուք հանված եք հրավիրյալների ցուցակից», գրում է լրատվամիջոցը։