նախընտրելի դարձնել
Պերուի հարավ-արևելքում գտնվող ռեստորանում, որտեղ նրանք հավաքվել էին ծննդյան տոնակատարության համար, բռնկված հրդեհի հետևանքով տասը համալսարանական ուսանող զոհվել է, ևս երեքը՝ վիրավորվել, հայտնում է AFP-ն՝ հղում անելով ոստիկանությանը։
Հինգշաբթի կեսօրին հրդեհ է բռնկվել Պունո Անդյան շրջանի Ուանկանա քաղաքում, որը գտնվում է Բոլիվիայի հետ սահմանին։ Զոհերը, որոնք 17-ից 23 տարեկան են եղել՝ մանկավարժական քոլեջի ուսանողներ են եղել։
«Ոստիկանության և դատախազության դատաբժշկական փորձագետների ժամանումից հետո հայտնաբերվել է 10 դի», - AFP-ին հայտնել է տեղի ոստիկանության աշխատակիցը։
Երբ կրակը տարածվել է շենքում՝ ուսանողները մնացել են Calma Tripa ռեստորանի փայտե շենքի երկրորդ հարկում։ Տեղական լրատվամիջոցները հայտնում են, որ հարևանները փորձել են մարել կրակը կրակմարիչներով և ջրով լի դույլերով։
Ուականեի քաղաքապետ Վալերիո Տապիան պետական լրատվական գործակալությանը հայտնել է, որ 20,000 բնակչություն ունեցող քաղաքում հրշեջ ծառայություն չկա։
Հարևան Խուլիակա քաղաքի հրշեջները ժամանել են մեկ ժամ անց՝ հրդեհը մարելու համար: Տեղական աղբյուրը, որը խնդրել է անանուն մնալ, AFP-ին ասել է, որ ռեստորանում հրդեհի պատճառը կարող է լինել գազի բաքի պայթյունը:
