Նիդերլանդների բնակչուհուն, որը վիճակախաղով 2,1 մլն եվրո էր շահել` լինելով ամուսնալուծության գործընթացում, թույլ են տվել նախկին ամուսնու հետ չկիսել շահումը: Ինչպես տեղեկացնում է Reuters-ը, համապատասխան որոշումը կայացրել է Ամստերդամի շրջանային դատավորը: Դատավճիռը հրապարակվել է երեքշաբթի, դեկտեմբերի 29-ին:
Ինչպես պարզաբանել են դատարանում, 2014-ի հոկտեմբերի 20-ին ամուսնալուծության հայտարարություն տալով` ամուսինները թվարկել են ընդհանուր ակտիվները, որոնք կցանկանային կիսել: Նիդերլանդուհին վիճակախաղում շահել էր 2015-ի սկզբին, պաշտոնական ամուսնալուծությունը ձեւակերպվել էր նույն տարվա հունիսին:
Ամուսինը պնդում էր, թե ամուսնության 30 տարիների ընթացքում ինքն ու կինը միշտ վիճակախաղի տոմս են գնել` օգտագործելով ֆինանսական ընդհանուր միջոցներ եւ որ շահումը պիտի ներառվի ամուսնալուծության համաձայնագրի մեջ: Սակայն դատարանը նշել է, որ ամուսինն ու կինը առնվազն չորս տարի առաջ առանձնացրել են իրենց ֆինանսները, երբ տղամարդը գնացել է նոր ընկերուհու մոտ ապրելու: Վիճակախաղի տոմսի համար նիդերլանդուհին վճարել է սեփական բանկային հաշվից եւ դատարանը համարել է, որ նա պարտավոր չէ կիսել շահումը, գրում է Gazeta-ն:
