Արարատի մարզի Դարակերտ գյուղի միջնակարգ դպրոցի մաթեմատիկայի ուսուցչուհի Սուսաննա Գալոյանի՝  6-րդ դասարանի աշակերտ Գեւորգ Սարուխանյանին հարվածելու դեպքի առթիվ հարուցվել է քրեական գործ: Այս մասին NEWS.am-ի թղթակցի հետ զրույցում ասաց գործով քննիչ Վարդան Ղազարյանը:

Նա նշեց, որ քրեական գործը հարուցվել է ՔՕ-ի 118-րդ հոդվածի հատկանիշներով:Այդ հոդվածով սահմանվում է ծեծելը կամ այլ բռնի գործողություններ կատարելը, որը չի առաջացրել սույն օրենսգրքի 117-րդ հոդվածով նախատեսված հետեւանքներ, պատժվում է տուգանքով` նվազագույն աշխատավարձի առավելագույնը հարյուրապատիկի չափով, կամ կալանքով` առավելագույնը 2 ամիս ժամկետով:

Քննիչի փոխանցմամբ՝  դատաբժշկական փորձաքննությունից հետո համապատասխան որակավորում կտրվի: Գործի շրջանակներում առայժմ մեղադրյալներ չկան:

Ավելի վաղ Գեւորգ Սարուխանյանի մայրը` Գայանեն մեզ հետ զրույցում պատմել էր, որ Արարատի մարզի Դարակերտ գյուղի միջնակարգ դպրոցի մաթեմատիկայի ուսուցչուհու հարվածի հետեւանքով 6-րդ դասարանի աշակերտը կորցրել է տեսողությունը 90 տոկոսով, եւ այն այլեւս ենթակա չէ բուժման: Այս ամենը հերքել էին ուսուցչուհու ամուսինը եւ փաստաբանը: Հաղորդումը ոստիկանությունը ստացել էր հուլիսի 17-ին, այն իրենց մոտ ուղարկվել է օգոստոսի 2-ին:  Նշանակվել էր դատաբժշկական փորձաքննություն, որի եզրակացությունը, սակայն, չի բավարարել քննիչին, եւ նա նշանակել է հանձնաժողովային փորձաքննություն: Այս փորձաքննության եզրակացությունը ստանալուց հետո էլ կորոշվի նյութերի հետագա ընթացքը: Նախապատրաստվող նյութերի շրջանակում ավելի քան 30 մարդ է հարցաքննվել: