Ապօրինի զենք եւ ռազմամթերք ձեռք բերելու, պահելու մեջ մեղադրվող՝ քրեական հեղինակություն «Քանաքեռցի Տույը»՝ Արթուր Ղազարյանը, տեղափոխվել է «Նուբարաշեն» քրեակատարողական հիմնարկի բուժմաս: Այս մասին NEWS.am-ի թղթակցին ասաց ՀՀ ԱՆ քրեակատարողական վարչության հանրային կապերի բաժնի պետ Գոռ Ղլեչյանը:
Նա նշեց, որ Արթուր Ղազարյանը հիվանդություն ունի, որի համար էլ բուժմաս է տեղափոխվել: Թե կոնկրետ ինչ խնդիր ունի կալանավորվածը, Գոռ Ղլեչյանը չհայտնեց՝ նշելով, որ Ղազարյանը չի ցանկանում այդ մասին հրապարակել:
Նշենք, որ ավելի վաղ «Տույի» փաստաբան Երեմ Սարգսյանը մեզ հետ զրույցում նշել էր, որ իր պաշտպանյալը 2-րդ կարգի հաշմանդամ է եւ բուժման կարիք ունի:
Հիշեցնենք, որ ըստ Քննչական կոմիտեի՝ Արթուր Ղազարյանն ապօրինի կերպով ձեռք է բերել եւ կրել հրազեն հանդիսացող «ВИКИНГ» մոդելի 9մմ տրամաչափի գործարանային արտադրության ակոսափող ատրճանակ եւ ռազմամթերք հանդիսացող 9մմ /9X19/ տրամաչափի փամփուշտներ, որոնք նրա մոտ հայտնաբերվել են 2015թ. հուլիսի 10-ին ՀՀ ոստիկանության Կենտրոնականի բաժնում կատարված անձնական խուզարկության ընթացքում:
Ա.Ղազարյանին մեղադրանք է առաջադրվել ՀՀ քրեական օրենսգրքի 235-րդ հոդվածի 1-ին մասով եւ նրա նկատմամբ որպես խափանման միջոց է կիրառվել կալանավորումը: Գործն ուղարկվել է Կենտրոն եւ Նորք-Մարաշ վարչական շրջանների դատախազություն: