Երեւանի «Շենգավիթ» բժշկական կենտրոնում անցած տարվա հուլիսին մահացած ծննդկան Նաիրա Աբգարյանի գործով քննության ընթացքում տվյալներ են ձեռք բերվել այլ հանցավոր դրսևորումների վերաբերյալ, որոնց ուղղությամբ եւս կատարվում են անհրաժեշտ քննչական գործողություններ։ Այս մասին NEWS.am-ի հարցմանն ի պատասխան հայտնել են Քննչական կոմիտեի դեպարտամենտի տեղեկատվության և հասարակայնության հետ կապերի բաժնից:
ՔԿ-ի փոխանցմամբ, նախնական քննության տվյալներով՝ ծննդկան Ն.Աբգարյանը ծննդաբերել է 2016թ. հուլիսի 21-ին «Շենգավիթ» բժշկական կենտրոնում, այնուհետև հուլիսի 22-ին տեղափոխվել «Սուրբ Գրիգոր Լուսավորիչ» բժշկական կենտրոն, որտեղ էլ հուլիսի 23-ին մահացել է: Ծննդկանի մահվան պատճառները պարզելու նպատակով իրականացվել են մի շարք քննչական եւ դատավարական այլ գործողություններ, նշանակվել փորձաքննություններ:
Դիակի դատաբժշկական փորձաքննության եզրակացության համաձայն՝ Ն.Աբգարյանի մահը հետևանք է՝ «ներանոթային տարածուն մակարդման համախտանիշի, որը պայմանավորված է 21.07.2016 թվականին արգանդային արյունահոսությամբ բարդացած կեսարյան հատմամբ ծննդալուծումից հետո հետծննդյան, արգանդի էքստիրպացիայից հետո վիճակով»:
Քրեական գործով նշանակվել է հանձնաժողովային դատաբժշկական կրկնակի փորձաքննություն, որի եզրակացությունը դեռ չի ստացվել:
Բազմակողմանի քննության ընթացքում տվյալներ են ձեռք բերվել նաեւ այլ հանցավոր դրսևորումների վերաբերյալ, որոնց ուղղությամբ եւս կատարվում են անհրաժեշտ քննչական գործողություններ։
Հիշեցնենք, որ ավելի վաղ գործով տուժողի իրավահաջորդի ներկայացուցիչ Լիանա Գասպարյանը մեզ հետ զրույցում հայտնել էր, որ վիրահատության համաձայնագրում, ըստ փորձաքննության, Նաիրա Աբգարյանի անվան դիմաց եղած ստորագրությունը կեղծված է: Փաստաբանի խոսքով, կար նաեւ գրառում, որն ասում էին, թե Նաիրա Աբգարյանն է արել, սակայն փորձաքննությամբ պարզվել է, որ այն նույնպես կեղծված է: Թե ում կողմից են կեղծվել այդ փաստաթղթերը, կպարզի քննությունը, սակայն ըստ փաստաբանի, փաստաթուղթը մեկ տարվա վաղեմություն ունի, ինչը նշանակում է, որ այն կեղծվել է «Շենգավիթ» բժշկական կենտրոնում:
Քննչական կոմիտեն թերեւս հենց այս հանցավոր դրսեւորումների էր հայտնել մեր հարցմանն ի պատասխան:
Հիշեցնենք, որ 44-ամյա Նաիրա Աբգարյանը կեսարյան հատումով զույգ էր ունեցել 2016թ. հուլիսի 21-ին մայրաքաղաքի «Շենգավիթ» բժշկական կենտրոնում, վիրահատությունը նորմալ էր անցել, ժամեր անց, սակայն, վիճակը կտրուկ վատացել էր, արյունահոսություն էր սկսվել: Ծննդկանը տեղափոխվել էր բազմապրոֆիլային հիվանդանոց, որտեղ էլ մահացել էր: