Էստոնիան ԵՄ անդամ երկրներից առաջինն է, որը վավերացրել է ՀՀ-ԵՄ Համապարփակ եւ ընդլայնված գործընկերության համաձայնագիրը։ Այդ մասին NEWS.am-ին հայտնել է ՀՀ ԱԳՆ մամուլի քարտուղար Տիգրան Բալայանը։
Էստոնիան ավարտել է Հայաստանի ու Եվրոպական միության միջեւ ստորագրված Համապարփակ եւ ընդլայնված գործընկերության համաձայնագրի՝ ուժի մեջ մտնելու համար անհրաժեշտ բոլոր ընթացակարգերը, դառնալով ԵՄ առաջին երկիրը, որ վավերացրել է այս փաստաթուղթը:
«Էստոնիայի ներպետական ընթացակարգը չի պահանջում խորհրդարանի վավերացում, այլ կառավարության որոշմամբ է, եւ կառավարությունն այդ որոշումն ընդունել է։ Էստոնիան Հայաստանին տեղեկացրել է, որ վավերացման ընթացակարգերն ավարտված են»,- նշել է Բալայանը։
ԵՄ մյուս 27 երկրների դեպքում անհրաժեշտ է խորհրդարանների վավերացման ընթացակարգ։ Հայաստանի արտաքին գործերի նախարարի տեղակալ Կարեն Նազարյանը դեկտեմբերին հայտնել էր, որ ՀՀ-ԵՄ համաձայնագիրը, ըստ ամենայնի, ամբողջությամբ կվավերացվի մինչեւ գարնան վերջ։
Նշենք, որ նոյեմբերի 24-ին Արեւելյան գործընկերության գագաթաժողովի շրջանակներում Հայաստանն ու Եվրամիությունը ստորագրեցին նոր Համապարփակ եւ ընդլայնված գործընկերության համաձայնագիրը։
