ԵՊՀ ռեկտոր Արամ Սիմոնյանը պարզաբանել է, թե ինչու են տարիներ շարունակ հարյուրավոր միլիոն դրամներ փոխանցել Երիտասարդական հիմնադրամին, որի նախագահը ՀՀԿ խմբակցության պատգամավոր Կարեն Ավագյանն է:

Նա նշեց, որ որ դեռեւս 2001 թվականից այդ պրակտիկան կա. «Եղել է պայմանավորվածություն ինձնից առաջ: 2001 թվականին, այն ժամանակվա նախագահի (Ռոբերտ Քոչարյան-խմբ) եւ ռեկտորների միջեւ, որ որպեսզի արտաբյուջեից ավելացված արժեքի 20 տոկոսը չվճարեն բուհերը, 2 տոկոսը փոխանցեն Երիտասարդական հիմնադրամին: 18 տոկոս այստեղ շահում ես, պարզ հաշվարկ է: Իսկ եթե լիներ օրենք, որ 20 տոկոսը պետք է վճարեն ԱԱՀ, դա բեռ կլիներ բոլոր բուհերի համար: Ինձնից առաջ էլ է վճարվել, ես էլ եմ վճարել»,-ասաց Արամ Սիմոնյանը:

Նա նշեց, որ այդ վճարման 50 տոկոսը այս կամ այն ծրագրերի ձեւով վերադարձվել է բուհին:

«Այս տարի հունվարին 25 մլն դրամը փոխանցել ենք, որից 15 մլն-ը հետ է եկել ուսման զեղչերի ձեւով, ուսման վարձ է փակվել: Մնացած մասը չենք փոխանցել եւ հիմա դա որպես պարգեւ բաժանելու ենք աշխատողներին՝ իրենց աշխատավարձի 50 տոկոսի չափով»,-հայտարարեց նա:

Հիշեցնենք, որ ԿԳ նոր նախարար Արայիկ Հարությունյանը հայտարարել էր, որ այլեւս բուհերը չպետք է գումարներ փոխանցել այդ հիմնադրամին: