Կուբանի նահանգապետ Ալեքսանդր Տկաչեւը, կապված, Մոսկվայի «Դոմոդեդովոյի» օդանավակայանում տեղի ունեցած ահաբեկչության հետ, հանձնարարական է տվել հասարակական վայրերում եւ տրանսպորտում ուժեղացնել անվտանգության միջոցառումները, վերահսկել Կրասնոդարի մարզ ժամանող մարդկանց զանգվածային հոսքը։
«Մեր մարզն ահաբեկիչների համար գրավիչ թիրախ է եղել եւ կլինի»,- հունվարի 25-ի խորհրդակցությանն ասել է նահանգապետը։ «Այստեղ են չորս միջազգային օդանավակայաններ, երկրի խոշորագույն նավահանգիստները, գլխավոր հանգստավայրերը։ Էլ չեմ խոսում Օլիմպիադայի մասին։ Նշանակում է՝ մենք կրկնակի ուշադիր պետք է լինենք եւ բոլոր ուղղություններով ուժեղացնենք պահպանությունը»,- ասել է Տկաչեւը։
«Ես ուզում եմ, որ բոլորը հասկանան. «Դոմոդեդովո» կարող է պատահել յուրաքանչյուր պահի եւ երկրի յուրաքանչյուր հատվածում։ Ձեռքերը ծալած նստելն ուղղակի հանցագործություն է»,- հայտարարել է նահանգապետը։
Ինչպես հայտնում է «ԻՏԱՌ-ՏԱՍՍ»-ը, Մոսկվայի «Դոմոդեդովոյի» օդանավակայանում տեղի ունեցած ահաբեկչության կապակցությամբ, Կրասնոդարի մարզի օդանավակայաններում անվտանգության ուժեղացված միջոցներ են ձեռնարկվել։
Համաձայն 2002 թվականի մարդահամարի տվյալների՝ Կուբանում բնակվում է շուրջ 275 հազար հայ՝ Ռուսաստանի հայ համայնքի 24,3 տոկոսը, սակայն իրական թվերը զգալիորեն գերազանցում են պաշտոնական տվյալները։ «Ռուսաստանի հայերի միության» Կրասնոդարի բաժանմունքի տվյալներով, Կուբանում ապրում է շուրջ 500 հազար հայ։ Կրասնոդարում բնակվում է 70 հազար հայ։ Սա Ռուսաստանի ամենամեծ հայ համայնքն է։
