Առողջապահության նախարարությունը ներկայացրել է Հայաստանում ալկոհոլային թունավորման դեպքերի վերջին՝ ճշգրտված տվյալնեը։ Ըստ այդմ, օգոստոսի 31-ից սեպտեմբերի 1-ն ընկած ժամանակահատվածում հանրապետությունում գրանցվել է ալկոհոլային թունավորման 23 դեպք, այդ թվում 11-ը՝ մահվան ելքով:
Այս մասին ֆեյսբուքյան իր էջում գրել է ԱՆ խոսնակ Ալինա Նիկողոսյանը։
«Հայցում ենք Ձեր ներողամտությունը: Երևանում մահվան դեպեքերի թիվը 3-ն է: Գումարային ստացվում է մահվան 11 դեպք»,– գրել է նա:
Ավելի վաղ Առողջապահության նախարարությունը հայտնել էր, որ ալկոհոլային թունավորումից մահացել է 10 մարդ, մեկ մարդ էլ՝ այլ պատճառով։
«23 դեպքից 17-ը (որից 8-ը՝ մահվան ելքով) գրանցվել են Արմավիրի մարզում, բոլորն էլ օգտագործել են նույն վայրից ձեռք բերված ոչ գործարանային արտադրության օղի:
Մնացած 6 դեպքերն արձանագրվել են Երևանում, որից 3-ը՝ մահվան ելքով: Բոլոր տուժածներն օգտագործել են բժշկական սպիրտ:
Տուժածները տեղափոխվել են հանրապետության տարբեր բժշկական կազմակերպություններ. 3-ը՝ Արմավիրի ԲԿ (3-ը` մահացած), 17-ը՝ Արմենիա ՀԲԿ (8-ը` մահացած), 2-ը՝ Թիվ 1 համալսարանական կլինիկա, 1-ը՝ Էրեբունի ԲԿ:
12 պացիենտից 3-ը գտնվում են ծայրահեղ ծանր վիճակում, այդ թվում 2-ը՝ միացված են արհեստական շնչառության սարքին, 3–ը՝ ծանր վիճակում, 2-ը՝ միջին ծանրության և 2 անձ՝ դեռևս առանց կլինիկական նշանների: Եվս 1-ը գրավոր հրաժարվել է բուժօգնությունից և դուրս է գրվել Արմենիա ՀԲԿ-ից:
Ներկայումս աշխատանքներ են իրականացվում ալկոհոլային խմիչք օգտագործողների շրջանակը պարզելու և կանխարգելիչ միջոցառումներ ձեռնարկելու ուղղությամբ»,- գրել էր Ալինա Նիկողոսյանը։
Այսպիսով վերջնական ճշտված տեղեկություններով` գրանցվել է ալկոհոլային թունավորման 23 դեպք` 11-ը մահվան ելքով:
