«Եզրագծից այն կողմ» եւ մի շարք այլ ֆիլմերում նկարահանված, «32 ատամ» ակումբի, թիվ 32 թատրոնի դերասաններից Կարեն Մկրտչյանին դեկտեմբերի 26-ի գիշերը անհայտ անձի կողմից վնասվածք հասցնելու դեպքի առթիվ դեռ քրեական գործ չի հարուցվել: Այս մասին NEWS.am-ին հայտնեցին ոստիկանության լրատվական ծառայությունից:

Չի հայտնաբերվել նաեւ նրան վնասվածք հասցրած անձը:

Զրուցեցինք նաեւ Կարեն Մկրտչյանի հետ, ով ասաց, որ հիմա համեմատաբար ավելի լավ է զգում, ցավերը ավելի քչացել են: Դերասանը, սակայն, շարունակում է մնալ անվասայլակին, բժիշկներին չի վստահում, այդ իսկ պատճառով տնային պայմաններում ժողովրդական բժշկության մեթոդներով փորձում է ապաքինվել:

Նա նշեց, որ իրենց շքամուտքում տեսախցիկներ չկան, առանձնապես հույսեր էլ չի կապում դեպքի բացահայտման հետ: «Ոչ մեկ ոչ զանգել է, ոչ հետաքրքրվել, այդ գիշերը չեն թողել քնեմ, շտապում էին,  երեւի խառն են ամանորյա նախապատրաստություններով, հարցաքննել են, բայց դատաբժշկի ուղեգիր էլ չեն տվել: Ինձ միայն անհանգստացնում է մեկ հարց՝  ո՞վ էր եւ ինչի՞, բայց ինչպես հասկանում եմ՝ դա իրավապահներին չի անհանգստացնում»,- ասաց դերասանը:

Ավելի վաղ NEWS.am-ը հայտնել էր, որ «Եզրագծից այն կողմ» եւ մի շարք այլ ֆիլմերում նկարահանված, «32 ատամ» ակումբի, թիվ 32 թատրոնի դերասաններից Կարեն Մկրտչյանը մարմնական վնասվածքներ է ստացել: Ոստիկանությունից NEWS.am-ին հայտնել էին, որ դեկտեմբերի 26-ին ոստիկանության Նոր Նորքի բաժնում «Սուրբ Գրիգոր Լուսավորիչ» բժշկական կենտրոնից ահազանգ է ստացվել, որ «ուղեղի ցնցում» ախտորոշմամբ իրենց մոտ է տեղափոխվել մի երիտասարդ: Պարզվել է, որ նա Երեւանի Գայի պողոտայի 2-րդ շենքի բնակիչ, 38-ամյա Կարեն Մկրտչյանն է, ով վնասվածքը ստացել է իրենց շենքի բակում՝ անհայտ անձի կողմից ստացած հարվածների հետեւանքով: Դեպքի առթիվ նյութեր են նախապատրաստվում, կատարվում է հետաքննություն: