նախընտրելի դարձնելԱպրիլի 6-ին, ժամը 16.05-ին, Չարենցավան քաղաքի մի բնակչուհի ոստիկանության Չարենցավանի բաժնում հաղորդում է տվել, որ ապրիլի 4-ից 6-ն ընկած ժամանակահատվածում դռան փականը բացելու միջոցով Չարենցավան քաղաքի 3-րդ թաղամասի 29 շենքի մոտ գտնվող, իրեն պատկանող շինությունից գողացել են հագուստով լի 7 պայուսակ` պատճառելով 1 500 000 դրամի նյութական վնաս:
Ինչպես NEWS.am-ը տեղեկանում է Ոստիկանության մամուլի ծառայությունից, ձեռնարկված օպերատիվ-հետախուզական միջոցառումների արդյունքում` ոստիկանության Չարենցավանի բաժին բերման են ենթարկվել Չարենցավան քաղաքի բնակիչներ, 1986 թ. ծնված Արթուր Իսպիրյանը, 1976 թ. ծնված, նախկինում դիտավորյալ սպանություն կատարելու համար դատապարտված Շիրազ Մարկոսյանը, 1974 թ. ծնված, նախկինում գողություն կատարելու համար դատապարտված Դավիթ Գյուլումյանը և 1986 թ. ծնված Վահան Խալաֆյանը:
Նրանք խոստովանել են, որ նշված գողությունն իրենք են կատարել և մատնացույց են արել գողոնի գտնվելու վայրը, որը և առգրավվել է:
Վ. Խալաֆյանը, որը, ՀՀ ՊՆ կենտրոնական ռազմաբժշկական հանձնաժողովի 07.03.2005 թ. որոշմամբ համարվել է զինվորական ծառայության համար ոչ պիտանի` «Անձի պաթոլոգիկ զարգացում վարքի կոպիտ խանգարումներով, ինքնավնասումներով» ախտորոշմամբ, գտնվելով ոստիկանության Չարենցավանի բաժնի պրոֆիլակտիկայի բաժանմունքի պետի աշխատասենյակում` պահարանից վերցրել է խոհանոցային դանակն ու հարվածել իրեն` որովայնի մասում պատճառելով մարմնական վնասվածք:
Խալաֆյանը շտապօգնության մեքենայով անմիջապես տեղափոխվել է «Չարենցավանի» բժշկական կենտրոն, որտեղ մահացել է: Հանցավոր խմբի մյուս անդամները ձերբակալված են: Կատարվում է քննություն:
