նախընտրելի դարձնելՄայիսի 6-ին Նյու Յորքում գումարվել է ՄԱԿ-ի Գլխավոր ասամբլեայի հանդիսավոր նիստը` նվիրված Երկրորդ համաշխարհային պատերազմի ավարտի 65-ամյակին, որտեղ ելույթներով հանդես են եկել ՄԱԿ-ի Գլխավոր քարտուղարը, ԳԱ նախագահը, մի շարք երկրների մշտական ներկայացուցչությունների ղեկավարներ:
Իր ելույթում ՄԱԿ-ում ՀՀ մշտական ներկայացուցիչ, դեսպան Կարեն Նազարյանը նշել է, որ Հայաստանը կարևոր դերակատարում է ունեցել ֆաշիզմի դեմ համընդհանուր պայքարում: Պատերազմի հինգ տարիների ընթացքում մոտ 600 հազար հայորդիներ զինակոչվել են բանակ` այն ժամանակ, երբ Հայաստանի ամբողջ բնակչությունը 1,5 միլիոնից պակաս էր, 300 հազարը կռվում էին ռազմաճակատներում և նրանցից տուն չվերադարձավ յուրաքանչյուր երրորդը:
Դեսպանը նաև անդրադարձել է, որ Հայաստանում ձևավորվել են վեց ազգային դիվիզիաներ, որոնք կարևորագույն դեր են խաղացել Մեծ Հայրենականի ռազմաճակատներում: Դրանցից մեկը 1943 թ.-ին հայերից կազմված «Սասունցի Դավիթ» տանկային շարասյունն էր, որի կազմավորումը ամբողջությամբ ֆինանսավորվեց հայկական Սփյուռքի կողմից: Դեսպան Նազարյանն անդրադարձել է նաև հակահիտլերյան կոալիցիայի անդամ երկրների բանակներում կռված բազմաթիվ հայերի հերոսությանն ու նրանց բերած ավանդին:
Ելույթում նշվել է նաև, որ խորհրդային բանակի պատմության պատվո էջերին ընդմիշտ գրված են հայազգի 3 մարշալների, 1 ծովակալ, 60 գեներալների, Խորհրդային միության 106 հերոսների և Փառքի 27 շքանշանակիրների և այլ քաջարի մարտիկների փառապանծ անունները: Իր ելույթը եզրափակելով, Կարեն Նազարյանը նշել է, որ Հայաստանում մեծապես գիտակցում են հաղթանակի և խաղաղության գինը, և որ Հայաստանն այսօր հանձնառու է և հորդորում է մյուսներին` անցյալից դասեր քաղելու և հակամարտությունների խաղաղ կարգավորմանն ուղղված ջանքերը բազմապատկելու, ինչը մեր լավագույն տուրքը կլինի պատերազմի վետերաններին:
ԳԱ հանդիսավոր նիստին ՀՀ ներկայացուցչության հատուկ հրավերով ներկա է եղել Հայաստանեայց Առաքելական եկեղեցու Ամերիկայի արևելյան թեմի առաջնորդ Խաժակ արք.Պարսամյանը, ինչպես նաև հայրենական պատերազմի վետերան` ծնունդով արցախցի Ալիշ Մաթևոսյանը:
Երկրորդ համաշխարհային պատերազմի ավարտի 65-ամյակին նվիրված միջոցառումների շրջանակներում ՄԱԿ-ի կենտրոնատեղիում բացվել է ֆոտոցուցահանդես «Հաղթել ենք միասին» խորագրով, որի կազմակերպանն օժանդակել և լուսանկարներ է տրամադրել նաև ՄԱԿ-ում Հայաստանի ներկայացուցչությունը:
Մայիսի 7-ին ԳԱ դահլիճում տեղի ունեցավ Հաղթանակի օրվան նվիրված համերգ` ԱՊՀ երիտասարդական սիմֆոնիկ նվագախմբի մասնակցությամբ:
