Տաթեւի վերակառուցման համար կազմակերպված i-Buy բարեգործական ակցիայի խաղարկության հաղթող Վահան Վարդանյանն արդեն այցելել է Տաթեւի վանական համալիր, նստել ճոպանուղի եւ հիմա վառ տպավորություններով պատրաստվում է վերադառնալ Ռուսաստան:

«Տաթեւում մինչեւ այդ չէի եղել, շատ տպավորված եմ: Լինելով ճարտարագետ առաջինը  նայում էի, թե ինչպե՞ս է ճոպանուղին կառուցված: Մեզ հետ ճոպանուղի էր  նստել նաեւ արտադրող կազմակերպության ներկայացուցիչը եւ մենք բավականին հարցեր էինք տալիս: Երբ դուրս եկանք ճոպանուղուց շատ ուժեղ քամի էր, սակայն ճոպանուղու մեջ չէր զգացվում: Նշանակվում է` այն շատ լավ է կառուցված»,- հոկտեմբերի 18-ին լրագրողների հետ հանդիպմանն  ասաց Վահան Վարդանյանը:

Ի դեպ նա անակնկալի է եկել, երբ իմացել է, որ հաղթել է  առցանց բարեգործական ակցիայում.

 «Երբ ծրագրին դիմում էի, առաջինը,  ինչը մտածում էի իմ լուման ներդնելն էր ծրագրի մեջ: Չէի մտածում, որ կհաղթեմ եւ արդեն պլանավորում էի լինել Հայաստանում ուրիշ առիթով` ֆինասնական ֆորումին մասնակցելու համար»,-ասաց նա` հավելելով, որ իր հաղթանակի մասին առաջինն իրեն տեղյակ են պահել ընկերներն` էլեկտրոնային փոստով:

Մյուս հաղթողը, շվեյցարիացի Ջուլիա Մոեքլին Տաթեւ կայցելի մայիս ամսին, քանի որ նա մեկնել է Հայաստանից հենց ճոպանուղու բացման օրը:

Նշենք, որ օգոստոսի 23-ից մինչեւ սեպտեմբերի 30-ը Տաթեւի վերակառուցման համար կազմակերպվել էր i-Buy առցանց բարեգործական ակցիա: Օն-լայն ռեժիմով նվիրատվություն կատարողները միաժամանակ մասնակից էին դառնում խաղարկությանը, որի ժամանակ էլ ընտրվել են երկու հաղթողներ` Ռուսաստանից Վահան Վարդանյանը եւ  Շվեյցարիայից Ջուլիա Մոեքլին: Ակցիայի ընթացքում հավաքվել է 5000 դոլար, եւ այն  ուղղվել է Տաթեւի վերականգնմանը: