նախընտրելի դարձնելԱրագածոտնի մարզի Թլիկ գյուղում փետրվարի 26-ին տաքսու վարորդին դաժանաբար սպանելու մեջ կասկածվող Վարդան Հովսեփյանը Գյումրիի բնակիչ է, սակայն Երեւանում էր ապրում:
NEWS.am-ի հետ զրույցում 25-ամյա Վարդանի մայրը` Անուշ Հովսեփյանը, նշեց, որ ինքը չի հավատում, որ որդին կարող էր մարդ սպանել:
«Երեկ պիտի Գյումրի գար, թե ինչպես է եղել, որ Թլիկում է հայտնվել, մենք չգիտենք, խաբար չենք: Իրիկունն արդեն զանգեց, ասաց, որ Թալինի ոստիկանությունում է: Թե իրականում ինչ է տեղի ունեցել, մենք խաբար չենք, թե ուրիշի պատճառով է եղել, չգիտենք, սպանվածին էլ չենք ճանաչում»,- ասաց տիկին Անուշը:
Վարդան Հովսեփյանն ավարտել է Հայաստանի պետական ճարտարագիտական համալսարանը եւ բնակվում էր Երեւանում: Թե որտեղ էր աշխատում, մայրը չհայտնեց:
Նշենք, որ ըստ ոստիկանության տարածած հաղորդագրության` փետրվարի 26-ին ժամը 17.45-ին ոստիկանության Թալինի ահազանգ էր ստացվել, որ Թլիկ գյուղի հարակից դաշտում հայտնաբերվել է դիակ՝ պարանոցի շրջանում արնահոսող վնասվածքով:
Ձեռնարկված միջոցառումներով պարզվել է դիակի ինքնությունը՝ 20-ամյա Կարլեն Գրիգորյան: Պարզվել է նաեւ, որ նույն օրը, ժամը 16:00-ի սահմաններում, 25-ամյա Վարդան Հ.-ն Երեւանի Լենինգրադյան փողոցից նստել է Կարլեն Գրիգորյանի «Մերսեդես C180» մակնիշի տաքսի ավտոմեքենան՝ Գյումրի մեկնելու նպատակով:
Արմավիր-Գյումրի ճանապարհին՝ Թլիկ գյուղի մոտ, վերջիններիս միջեւ ծագել է վիճաբանություն, որի ընթացքում Վարդան Հ.-ն դանակով հարվածել է Կ. Գրիգորյանին, պատճառել մահ, ապա դիմել է փախուստի:
Ձեռնարկված օպերատիվ-հետախուզական միջոցառումների շնորհիվ՝ ժամը 19.45-ի սահմաններում նշված գյուղի դաշտից հայտնաբերել եւ բերման է ենթարկել Վարդան Հ.-ն, որը խոստովանել է կատարած հանցագործությունը:
Հանցագործության գործիք դանակն առգրավված է:
Վարդան Հ.-ն ձերբակալված է:
Կատարվում է քննություն:
