Եվրոպան այդքան էլ չի փորձում եզրակացություններ անել սեփական անմտություններից։ Այս մասին NEWS.am-ի թղթակցի հետ զրույցում կարծիք է հայտնել Ռուսաստանի գիտությունների ակադեմիայի Համաշխարհային տնտեսության եւ միջազգային հարաբերությունների ինստիտուտի գիտաշխատող, քաղաքագետ, թուրքագետ Վիկտոր Նադեին Ռաեւսկին՝ պատասխանելով հարցին, թե արդյոք Եվրոպան եզրակացություններ արել է կատալոնյան ճգնաժամից եւ արդյոք պատմությունը շարուն ակություն կունենա:

Նրա խոսքով՝  Իսպանիայում հակամարտությունը կարող էր լուծվել մինչեւ դրա սրվելը։  «Ամեն դեպքում, դա բանակցությունների հարց է: Սրանք տեղական եւ կենտրոնական իշխանությունների միջեւ գործառույթների բաշխման հարցեր են»,-պարզաբանել է փորձագետը` հավելելով, որ այս խնդիրը հիշեցնում է Խորհրդային Միությունում տեղ գտած իրավիճակին: Այսպես, քաղաքագետը նշում է, որ կենտրոնը միշտ էլ ինքն է որոշում, թե որքան ֆինանսական միջոցներ ինչ ծավալներով եւ որտեղ պետք է  բաշխվեն, ինչը միշտ չէ, որ գոհացնում է մարզային իշխանություններին: Կատալոնիայի դեպքում կենտրոնը շատ ավելի քիչ  միջոցներ էր հատկացրել, քան վերցրել է։

Այսպես, ըստ Վիկտոր Նադեին Ռաեւսկիի՝ այս հարցում տնտեսական բաղադրիչը ակնհայտ էր: Սակայն դա կատալանցիների դժգոհության միակ պատճառը չէր: Նույնքան կարեւոր էր իսպանացիների վերաբերմունքը նրանց նկատմամբ: Այսպես, ըստ քաղաքագետի, Իսպանիայում ազգայնական տրամադրությունների կտրուկ աճ էր նկատվում՝  Կատալոնիայի նկատմամբ հստակ  արտահայտված թշնամանքով:

Փորձագետը ընդգծել է, որ Իսպանիայի իշխանությունները չկարողացան հաղթահարել Կատալոնիայի նկատմամբ ինքնահավանությունը եւ այդ խնդիրը դեռեւս լուծված չէ: « Ես սպասում եմ Կատալոնիայում նոր «պայթյունի», բայց այն  այս անգամ լրիվ այլ, ծայրաստիճան տհաճ  ձեւեր կունենա,  որը բնութագրական չէ  Իսպանիայի պես բարեկեցիկ երկրին»,-եզրափակել է Վիկտոր Նադեին Ռաեւսկին:

Հիշեցնենք, որ  Մադրիդի կողմից պարտադրված Կատալոնիայի շրջանային  խորհրդարանական արտահերթ ընտրություններում անկախության աջակիցները մանդատների բացարձակ մեծամասնություն  էին ստացել։