Լոնդոնը մտադիր է բրիտանական հետախուզության համար աշխատած ՌԴ ԳՀՎ նախկին գնդապետ Սերգեյ Սկրիպալի թունավորման գործը քննարկել ՆԱՏՕ-ի դաշնակիցների հետ, հայտնում է Independent-ը՝ վկայակոչելով խորհրդարանական Թոբիաս Էլվուդին:

«Պետք չէ, որ մենք ինքներս մեզնից առաջ անցնենք, սակայն մենք պարտավոր ենք լիարժեք պատասխան տալ, եւ դա այն է, որը մենք կքննարկենք ՆԱՏՕ-ի մեր գործընկերների հետ»,- հայտարարել է Էլվուդը:

Պարբերականի տեղեկություններով՝ Էլվուդին աջակցում է Միացյալ Թագավորության անվտանգության նախարար Բեն Ուոլեսը, որն արդեն հիշատակել է Մեծ Բրիտանիայի որոշ «հզոր դաշնակիցների» եւ Լոնդոնի՝ «ամբողջ ուժով» պատասխանելու պատրաստակամության մասին:

Ավելի վաղ հաղորդվել էր, որ բրիտանացի զինվորականները տարհանում են վարակված մեքենաները, շտապ օգնության մեքենաները եւ այլ իրեր զինվորական լաբորատորիայում հետազոտելու համար: Դրանից զատ, ոստիկանությունը շրջափակել է Սոլսբերիի գերեզմանատեղին, որտեղ թաղված են Սկրիպալի հարազատները, իսկ նրանց գերեզմանների մոտ վրան է խփված, որի մոտ նկատվել են կենսաբանական պաշտպանության հանդերձանքով մարդիկ:

ԳՀՎ նախկին աշխատակից Սերգեյ Սկրիպալը եւ նրա դուստր Յուլյան անգիտակից վիճակում հայտնաբերվել են մարտի 4-ին Սոլսբերիի այգու նստարանին: Նրանց տեղափոխել են հիվանդանոց ծայրահեղ ծանր վիճակում, նրանք մինչեւ հիմա կոմայի մեջ են, բժիշկները նրանց վիճակը կայուն ծանր են գնահատում: Ոստիկանությունում պարզել են, որ նրանք թունավորվել են նյարդակաթվածահարող նյութով, թունավորված են եղել եւս 20 մարդ, այդ թվում՝ ոստիկան, որն առաջինն է այցելել դեպքի վայր եւ Սկրիպալի տուն: Թունավորման փաստով հարուցվել է քրեական գործ մահափորձի հանցակազմով: