Հայաստանում գյուղատնտեսական ոլորտի զարգացման համար անհրաժեշտ է լուրջ քայլեր նախաձեռնել։ Այս մասին մայիսի 7-ին Ազգային ժողովի նիստում կառավարության 2019թ․ ծրագրի իրականացման զեկույցի քննարկման ժամանակ ասաց «Բարգավաճ Հայաստան» կուսակցությունից Միքայել Մելքումյանը։ Պատգամավորը, մասնավորապես, ներկայացրեց համախառն ներքին արտադրանքի կառուցվածքը, որպեսզի պարզի, թե բավարար է արդյոք այն։ «Առեւտրի եւ ծառայությունների աճը աննախադեպ էր, դրանք միասին կազմել են 54%, գյուղատնտեսությունը՝ 12%։ Սա, ի դեպ, շատ հազվադեպ աճ է։

Շինարարությունը գրանցել է 7,5% աճ, արդյունաբերությունը՝ 19,5%, եւ մաքուր հարկերը՝ 7,5%։ Ես չեմ կարծում, որ լավ գաղափար կլինի մշտական խոսել այն մասին, որ գյուղատնտեսության նման վիճակը կապված է վիճակագրության մեջ փոփոխությունների հետ։ Մեր ՀՆԱ-ում գյուղատնտեսությունը թողնում է ընդամենը 859 մլրդ դրամ, եւ դա շատ քիչ է»,- ասաց Մելքումյանը։

Նա նշեց, որ Հայաստանի գյուղատնտեսության ոլորտում աշխատում է 380-400 հազար մարդ։ Եւ եթե նախորդ տարիներին Հայաստանում աշխատանքի արտադրողականությունը կազմում էր ամսական 550-600 դոլար, ինչը խորհրդարանականը անվանեց ամոթալի ցածր ցուցանիշ, ապա այժմ այն ընկել է նույնիսկ մինչեւ 350-400 դոլար։ Մելքումյանի կարծիքով՝ դրա համար կան ինչպես օբյեկտիվ, այնպես էլ սուբյեկտիվ պատճառներ։