նախընտրելի դարձնել
Լուգանսկից XVIII դարի սրբապատկերը, որը նվիրել էր Բոսնիա եւ Հերցեգովինայի Պրեզիդիումի նախագահ Միլորադ Դոդիկը ՌԴ ԱԳ նախարար Սերգեյ Լավրովին, կվերադարձվի նվիրատուներին դրա պատմությունը պարզելու համար Ինտերպոլի գծով, շաբաթ ՏԱՍՍ-ին հայտնել են ՌԴ ԱԳՆ-ից:
«Սրբապատկերը կվերադարձվի նվիրատուներին դրա պատմությունը պարզելու համար Ինտերպոլի գծով»,-ասել են դիվանագիտական գերատեսչությունում:
Ինչպես ավելի վաղ հաղորդել էր Srna գործակալությունը, Դոդիկը նվիրել էր Լավրովին ոսկեզօծ սրբապատկերը, որը ստեղծվել է Լուգանսկում, դեկտեմբերի 14-ին Լավրովի՝ Բոսնիա եւ Հերցեգովինա կատարած այցի ժամանակ: Գործակալությունը տեղադրել էր սրբապատկերի, ենթադրաբար, Նիկոլայ Հրաշագործի լուսանկարը եւ սրբապատկերի հետեւի կողմում կարմիր կնիքի լուսանկարը, որի վրա նշված է. «ՈւԽՍՀ: Կրթության ազգային կոմիտե: Ուկրգիտություն: Օդեսայի շրջանային հանձնաժողով»:
Հինգշաբթի Բոսնիա եւ Հերցեգովինայի ԱԳՆ ղեկավար Բիսերա Տուրկովիչը հայտնել է, որ Բոսնիա եւ Հերցեգովինայում Ուկրաինայի դեսպանատունը հանրապետության ԱԳՆ է ուղարկել նոտա՝ պահանջելով վերադարձնել ուկրաինական կողմին Լուգանսկից սրբապատկերը: Նախարարի խոսքով՝ դեսպանատունը հարցրել է՝ ինչպես է սրբապատկերը հայտնվել Բոսնիա եւ Հերցեգովինայում, եւ պահանջել պարզաբանում: Բոսնիա եւ Հերցեգովինայի մահմեդականների ներկայացուցիչ, նախարար Տուրկովիչը հայտարարել է, որ կձգտի վերադարձնել սրբապատկերն Ուկրաինային: Ուրբաթ Բոսնիա եւ Հերցեգովինայի դատախազությունը հարուցել է քրեական գործ եւ սկսել ստուգել սրբապատկերի ծագումը:
