Տասնհինգ պակիստանցի զինծառայող է սպանվել Աֆղանստանի Հելմանդ նահանգում այն բանից հետո, երբ «Թալիբան» շարժման ուժերը պատասխանել են Աֆղանստանի տարածքի, այդ թվում՝ մայրաքաղաք Քաբուլի վրա Պակիստանի իրականացրած օդային հարվածներին, հայտնում է NDTV-ն։

Հելմանդ նահանգի կառավարության մամլո խոսնակ Մավլավի Մոհամմադ Քասիմ Ռիազը հայտնել է լրատվամիջոցներին, որ պակիստանցի 15 զինծառայող է սպանվել նախորդ գիշերը՝ Դյուրանդի գծի մոտ գտնվող Բահրամպուր շրջանում Աֆղանստանի ուժերի պատասխան գործողության ընթացքում։

Ըստ նրա, այդ գործողության ընթացքում աֆղանական ուժերը գրավել են նաև պակիստանյան երեք ռազմական հենակետ, ինչպես նաև զենք և ռազմամթերք։ Պակիստանի կողմից Քաբուլի և Պակտիկայի նահանգների վրա իրականացված վերջին օդային հարվածներից հետո Աֆղանստանի զինված ուժերը սկսել են հարվածներ հասցնել պակիստանյան հենակետերին Հելմանդի, Քանդահարի, Զաբուլի, Պակտիկայի, Պակտիայի, Խոստի, Նանգարհարի և Կունարի նահանգներում։

Այս բոլոր նահանգները գտնվում են պակիստանա-աֆղանական սահմանի երկայնքով։ Հինգշաբթի օրը Աֆղանստանում տեղի է ունեցել երեք պայթյուն՝ երկուսը Քաբուլում և մեկը՝ հարավարևելյան Պակտիկայում։ Աֆղանստանի պաշտպանության նախարարությունը, որը վերահսկվում է թալիբների կողմից, մեղադրել է Իսլամաբադին՝ իր ինքնիշխանությունը խախտելու մեջ։

«Պակիստանի բանակի կողմից Քաբուլի վրա իրականացված օդային հարվածների պատասխանն է, որ «Թալիբան»-ի ուժերը մղում են կատաղի մարտեր պակիստանյան անվտանգության ուժերի հետ՝ տարբեր շրջաններում՝ «սահմանի երկայնքով»», — նշված է աֆղանական զինված ուժերի հայտարարության մեջ։

Ավելի ուշ պաշտպանության նախարարության ներկայացուցիչ Էնայաթ Խովարազմը AFP-ին հայտնել է, որ «հաջող» գործողություններն ավարտվել են կեսգիշերին։

«Եթե հակառակորդ կողմը կրկին ներխուժի Աֆղանստանի տարածք, մեր զինված ուժերը պատրաստ են պաշտպանել իրենց տարածքը և կպատասխանեն կոշտ կերպով», — ասել է նա։

Իսլամաբադը չի հաստատել, որ կապ ունի հինգշաբթի տեղի ունեցած ահաբեկչությունների հետ, սակայն կոչ է արել Քաբուլին «դադարեցնել պակիստանյան թալիբներին իր տարածքում ապաստան տալը»։ Նաև որպես Պակիստանի «Թալիբան» շարժում հայտնի՝ «Թեհրիք-է-Թալիբան Պակիստան» խմբավորումը գաղափարական դաշնակից է Աֆղանստանի «Թալիբան» շարժմանը և աջակցել է նրան 2001–2021 թվականների հակամարտության ընթացքում։

Իսլամաբադը մեղադրել է «Թեհրիք-է-Թալիբան Պակիստան» խմբավորմանը՝ 2021 թվականից ի վեր իր հարյուրավոր զինծառայողների մահվան մեջ։