Սինգապուրը բնապահպանական առումով մաքուր ավիացիոն վառելիքի օգտագործման համար տուրք է սահմանում երկրից մեկնող ուղևորների համար։

Տուրքը կգործի հաջորդ տարվա հոկտեմբերի 1-ից, գրում է Bloomberg-ը։ Դրա չափը կախված կլինի սպասարկման դասից և թռիչքի հեռավորությունից։ Առավելագույն գումարը՝ 41.6 սինգապուրյան դոլար (31.95 ամերիկյան դոլար), կգանձվի Հյուսիսային և Հարավային Ամերիկա թռիչքներով մեկնող առաջին և բիզնես դասի ուղևորներից։ Հարավարևելյան Ասիա մեկնող էկոնոմ դասի ուղևորների համար տուրքը կկազմի 1 սինգապուրյան դոլար։

Տարանցիկ չվերթները կազատվեն վճարից, իսկ բեռնափոխադրումը կվճարվի մեկ կիլոգրամի համար։

Սինգապուրը դարձել է աշխարհում առաջին երկիրը, որը նմանատիպ տուրք է սահմանում։ Ընդ որում, քաղաքը կարևոր ավիացիոն հանգույց է. տեղի Չանգի օդանավակայանն այս տարի կարող է սպասարկել 68.3 միլիոն մարդու՝ գերազանցելով 2019 թվականի ռեկորդը։

Հավաքագրված միջոցներն ուղղվելու են բնապահպանական առումով մաքուր ավիացիոն վառելիքի ձեռքբերմանը, որն արտադրվում է, այդ թվում, գյուղատնտեսական հումքից։ Սինգապուրը նախատեսում է մինչև 2030 թվականը նման վառելիքի օգտագործման բաժինը հասցնել 3-5%։