Բենզինի գների աճը մեծապես պայմանավորված է Իրանի հետ պատերազմի հետևանքներով, որոնք անմիջականորեն առնչվում են Հորմուզի նեղուցին։ Վերջինս Պարսից ծոցից նավթի և գազի արտահանման հիմնական ծովային ուղին է։ Ինչպես հայտնում է Fortune-ը, պատերազմի պատճառով նեղուցը փաստացի շրջափակված է և հաշվի առնելով համաշխարհային տնտեսության համար դրա կարևորությունը՝ կառավարություններն արդեն իսկ նավագնացության վերականգնման ծրագրեր են մշակում՝ մարտական գործողությունների դադարեցումից հետո իրականացնելու նպատակով։

Ֆրանսիայի նախագահ Էմանուել Մակրոնը գլխավորում է էներգակիրների հասանելիության ապահովմանն ուղղված միջազգային նախաձեռնությունները։ Ծրագրվում է, որ «համապատասխան պայմանների դեպքում» ռազմական նավերը կուղեկցեն լցանավերին ու բեռնատար նավերին՝ ապահովելով դրանց ազատ անցումը։

Այդուհանդերձ, Հորմուզի նեղուցի առանձնահատկություններին քաջածանոթ նախկին զինվորականները նախազգուշացնում են, որ քանի դեռ հրադադար չի հաստատվել, նավեր ուղարկելու փորձը կլինի «ինքնասպանություն»՝ հաշվի առնելով նեղ անցուղիներն ու մանևրելու սահմանափակ հնարավորությունները։ «Ներկայիս պայմաններում ռազմական կամ քաղաքացիական նավերի դեպի նեղուց մուտքը կործանարար կլիներ»,— նշել է ֆրանսիական նավատորմի նախկին փոխծովակալ Պասկալ Օսյորը։ Ըստ նրա՝ միայն զինադադարի կնքումից հետո իրավիճակը կդառնա «վտանգավոր, բայց վերահսկելի», ինչը հնարավորություն կտա ներգրավել ռազմական նավեր և սկսել ուղեկցման գործողությունները։

Կարմիր ծովում առկա սպառնալիքների դեմ պայքարի փորձը նպաստում է նմանատիպ առաքելությունների նախապատրաստմանը։ Ֆրանսիական, ամերիկյան և բրիտանական անձնակազմերն արդեն իսկ բախվել են իրանամետ հուսիների կողմից իրականացվող հրթիռային և անօդաչու սարքերի հարձակումներին՝ պաշտպանելով առևտրային նավերը։ Ֆրանսիական ֆրեգատները հետ են մղել հարվածները՝ գնդացիրների, հրանոթների և ՀՕՊ ժամանակակից միջոցների օգնությամբ։ Մասնավորապես, Alsace ֆրեգատը 2024 թվականին բեռնատար նավի ուղեկցման ժամանակ երեք բալիստիկ հրթիռ է խոցել։

Այդուհանդերձ, Իրանն օժտված է զգալիորեն ավելի հզոր սպառնալիքներով, քան Եմենում գործող իր դաշնակիցները, ներառյալ՝ հականավային հրթիռները, ԱԹՍ-ները, արագընթաց մոտորանավակները և ծովային ականները։ Շարունակվող պատերազմի պայմաններում նեղուցը մնում է «չափազանց վտանգավոր», նշում է փոխծովակալ Միշել Օլգարեն։ Լցանավերի անվտանգությունն ապահովելու համար անհրաժեշտ է չեզոքացնել Իրանի տարածքում գտնվող ցամաքային հարվածային կայանքների մեծ մասը, իրականացնել մշտական դիտարկում և հետախուզություն։ «Դա մոտ ապագայում տեղի չի ունենա»,— ընդգծել է նա։

Մեկ այլ խնդիր է ապահովագրական ընկերություններին և նավատերերին համոզելը, որ Հորմուզի նեղուցով տարանցումն անվտանգ է։ Նեղուցում նավերի ապահովագրավճարները հասել են ծայրահեղ բարձր մակարդակի, ինչը տնտեսապես ոչ շահավետ է դարձնում փոխադրումները։ Ռազմական նավերի կողմից առևտրային նավերի հնարավոր ուղեկցումը կարող է վերականգնել ապահովագրողների վստահությունը և նվազեցնել ռիսկերը, ինչպես դա արվել է նախկին հակամարտությունների ժամանակ։