Խորենացի փողոցում քիչ առաջ ավարտվեց ի պաշտպանություն «Սասնա ծռերի» ընթացող հանրահավաքը։
Հանրահավաքի նախաձեռնող խմբի մեջ վեճ էր ծագել հետագա գործողությունների շուրջ։ NEWS.am-ի թղթակիցը հայտնում է, թե նախաձեռնող խումբը հարթակում քննարկում էր իր հետագա գործողությունները։ Ալեք Ենիգոմշյանը ոստիկաններից ավելի վաղ պահանջել էր վերականգնել կապը զինված խմբի հետ, սակայն իրավապահները որեւէ պատասխան չէին տվել։
Արդեն հարթակում նախաձեռնող խումբը առանձին քննարկում արեց, որից հետո ԱԻՄ նախագահ Պարույր Հայրիկյանը հայտարարեց, թե պայքարը կարող է տեւել մի քանի օր, մեկ շաբաթ։ Նա կոչ արեց մարդկանց մարդկանց գնալ տուն եւ հավաքվել հուլիսի 27-ին, երեկոյան ժամը 19-ին։
Հայրիյկյանի կոչը դժգոհության ալիք բարձրացրեց հավաքվածների մեջ, լսվեցին սուլոցներ, Ալեք Ենիգոմշյանը հայտարարեց, որ դա Հայրիկյանի կարծիքն է, իրենց նման բան չեն պայմանավորվել։ Նախաձեռնող խմբի մեջ վեճ սկսվեց, անգամ Հայրիկյանին փորձում էին բավական կոպիտ ձեւով հեռացնել հարթակից։
Իրավիճակը հարթելու համար Ենիգոմշյանը ձայն տվեց կանադահայ դերասանուհի Արսինե Խանջյանին։ «Այսօր անկախություն ունինք, ազատություն էլ որոշ չափով, բայց դրախտավայր չի դառել դեռ մեր երկիրը։ Պահանջներ ունեք, եւ ձեր պահանջները ճիշտ են։ Պետք է շարունակենք եւ հասնենք այդ պահանջների կատարմանը։ Խնդրեմ՝ մի դադրիք, հուսահատությունը մեր իրավունքը չէ»,- նշել է Արսինե Խանջյանը։
Դրանից հետո նախաձեռնող խումբը կրկին շարունակեց բուռն քննարկումը, ի վերջո որոշվեց հանրահավաքը ավարտել եւ շարունակել հուլիսի 27-ի երեկոյան։
Այդ հայտարարությունից հետո էլ տեւական ժամանակ հանրահավաքի մասնակիցներից շատերը վրդովված վիճում եւ վիրավորում էին նախաձեռնող խմբի մի քանի անդամների՝ արմատական գործողություններ պահանջելով։ «Հիմնադիր խորհրդարանի» անդամ Հրաչիկ Միրզոյանն ու քաղաքագետ Անդրիաս Ղուկասյանը փորձում էին հանգստացնել մարդկանց։