Շվեդիայի հայ եկեղեցական համայնքը Սուրբ Ծնունդին մեծ խրախճանք է կազմակերպել համայնքի գրեթե բոլոր եկեղեցիներում։ Այս մասին NEWS.am-ի թղթակցի հետ զրույցում ասաց Ստոկհոլմի հայ եկեղեցական համայնքի ատենապետ Հրաչ Մարությանը։

«Տարբեր միություններ տարբեր կերպ են նշել Ամանորը։ Բնական է, որ Եվրոպայում ենք ապրում եւ նրանց հետ դեկտեմբերի 25-ին նշել ենք Սուրբ Ծնունդը, իսկ Կաղանդը նշել ենք ընտանեկան մթնոլորտում։ Հայերիս համար հունվարի 6-ն էլ է շատ կարեւոր օր է, եկեղեցական համայնքներում Սուրբ Ծնունդին նախորդող օրը ոչ միայն Ճրագալույցի պատարագ է մատուցվել, այլեւ մեծ խրախճանք ենք կազմակերպել»,- ասաց Հրաչ Մարությանը։

Շվեդահայ համայնքը կազմավորվել է 1970-ական թվականներին՝ ի հաշիվ Լիբանանից, Պաղեստինից, Սիրիայից, Իրանից գաղթած հայերի։ Երկրում հայերի թվի ստվարացմանը զուգընթաց՝ սկսել է ձեւավորվել համայնքի ազգային կյանքը։

Վերջին տվյալներով, Շվեդիայում բնակվում է շուրջ 12 հազար հայ, որից 4 հազարը՝ Ստոկհոլմում: Շվեդահայերի մեծ մասն աշխատում է գործարաններում, պետական կամ մասնավոր հաստատություններում։