Լեռնային Ղարաբաղի Հանրապետության Կառավարության որոշմամբ` Աղդամը վերանվանվել է Ակնա: Քաղաքը դարձել է Ասկերանի թաղամասերից մեկը:
Տարածքային կառավարման եւ տեղական ինքնակառավարման վարչության պետ Սերգեյ Նասիբյանի խոսքով, այդ որոշման նպատակը Աղդամի բնակիչներին հողատարածքների հատկացման գործընթացի կարգավորումն է եւ այլ կենցաղային խնդիրների լուծումը:
«Քանի որ Աղդամին դեռ կարգավիճակ չի տրվել, այն որպես Ակնա թաղամաս միացվել է Ասկերանի քաղաքային համայնքին», - Ազատություն ռադիոկայանին ասել է Նասիբյանը:
ԼՂՀ Կառավարության տվյալներով, Աղդամում մշտապես բնակվում է 360 մարդ: Նրանք հիմնականում զբաղվում են հողագործությամբ եւ անասնապահությամբ:
Աղդամը, ի տարբերություն մերձակա գյուղերի, դեռ ընդգրկված չէ բնակեցման ծրագրերում: Քաղաքում բացակայում են ջուրն ու էլեկտրականությունը:
