Ադրբեջանցի միլիարդատեր Իսմաիլովի հաշվեհարդարի զոհ հայազգի Սուրեն Խաչատուրովը դեկտեմբերի 11-ին 8 ամիս տեւած կալանքից ազատ արձակվելուց հետո շարունակում է մնալ հիվանդանոցում: Այս մասին NEWS.am-ի հետ զրույցում ասաց նրա շահերի պաշտպան Նիկոլայ Բաղդասարյանը: Սուրեն Խաչատուրովն անազատության մեջ գտնվելու ընթացքում կաթված էր ստացել, այժմ նա խնդիրներ ունի տեղաշարժվելու հետ կապված եւ արյան ճնշման տատանումներ: Հիվանդանոցում այժմ նա ստանում է անհրաժեշտ բուժումը:
Նշենք, որ Սուրեն Խաչատուրովը «Դատապարտյալների հիվանդանոց» ՔԿՀ-ից ազատ արձակվելուց հետո շտապօգնության մեքենայով անմիջապես տեղափոխվել էր քաղաքացիական հիվանդանոց:
Մարդու իրավունքների եվրոպական դատարանը որոշում էր կայացրել, ըստ որի կասեցվել էր ՌԴ քաղաքացի ազգությամբ հայ Սուրեն Խաչատուրովի հանձնումը Ռուսաստանի Դաշնությանը: Սուրեն Խաչատուրովը երկար ժամանակ ընտանիքի հետ բնակվել է Ռուսաստանի Դաշնությունում, այնտեղ զբաղեցրել է տարբեր պաշտոններ: Ի պաշտոնե նա վերահսկողություն է իրականացրել այլ անձանց, այդ թվում նաեւ ազգությամբ ադրբեջանցի Թելման Իսմաիլովի օբյեկտների նկատմամաբ: Նա բազմաթիվ խախտումներ է հայտնաբերել նրա օբյեկտում, որից հետո, ըստ Խաչատուրովի, Թելման Իսմաիլովը հաշվեհարդար է փորձել տեսնել նրանից եւ շինծու քրեական գործ է սարքել նրա նկատմամբ: Սուրեն Խաչատուրովի նկատմամբ քրեական հետախուզում է սկսվել, որից հետո հասկացել է, որ Ռուսաստանի իշխանությունների կամայականություներից չի կարող պաշտպանվել եւ լքել է Ռուսաստանի տարածքը:
Հայաստան տեղափոխվելուց հետո նա վատառողջ է եղել, գտնվել է հիվանդանոցում: Այդ ժամանակ էլ նրա նկատմամբ հայտարարվել է հետախուզում եւ արդեն 8 ամիս է նա անազատության մեջ է գտնվում: