Երեւանի «Լիա» գեղեցկության սրահում մեկ տարի առաջ տեղի ունեցած սպանության գործով դատարանը որոշում է կայացրել բերման ենթարկել գործով վկա, Լեւոն Ղազարյանի («Երրորդմասցի Լյովիկի») սպանության գործով մեղադրյալ Սարգիս Հախանումյանի եղբորը՝ Դավիթ Հախանումյանին: Երեւանի Շենգավիթ վարչական շրջանի ընդհանուր իրավասության դատարանը նման որոշում է կայացրել այն բանից հետո, երբ որպես վկա դատակոչված Դավիթը պատշաճ ծանուցված լինելով չի ներկայացել դատարան:
Այս գործով բերման կենթարկվի նաեւ մեկ տարի առաջ «Լիա» գեղեցկության սրահում սպանված Գեւորգ Ավետիսյանի եղբայրը՝ Վահան Ավետիսյանը: Նա դատարանին տեղեկացրել էր, որ առողջական խնդիրներ ունի եւ չի կարող ներկայանալ դատարան: Դատավոր Նելլի Բաղդասարյանը տեղեկացրեց, որ դատարանը բազմիցս փորձել է կապ հաստատել նրա հետ նշված հեռախոսահամարով, սակայն, այն անհասանելի է:
Նշենք, որ 2016թ. նոյեմբերի 13-ին տեղի ունեցած հրաձգության հետեւանքով մահացել են 25-ամյա Գեւորգ Ավետիսյանը եւ 30-ամյա Մուշեղ Մուշեղյանը: Այս գործով կա երեք ամբաստանյալ.
Պետրոս Իսրայելյանին մեղադրանք է առաջադրվել Քրեական օրենսգրքի 104-րդ հոդվածի 2-րդ մասի 7-րդ կետով, Ա. Բանդուրյանին («Նորատուսցի Ալիկ»)՝ Քրեական օրենսգրքի 38-112-րդ հոդվածի 2-րդ մասի 6-րդ կետով, Ա. Գասպարյանին («Բդո»)՝ Քրեական օրենսգրքի 335-րդ հոդվածի 1-ին մասով: