Առողջապահության համաշխարհային կազմակերպությունը հայտարարել է սիրիական Դումայում քիմիական զենքի կիրառման ակնհայտ նշանների առկայության մասին: Այս քաղաքի 500 բնակիչների մոտ գրանցվել են թունավոր քիմիական նյութերով թունավորվելու ախտանիշներ, ապրիլի 11-ին Ժնեւում հայտնել է կազմակերպությունը՝ վկայակոչելով Սիրիայում իր բժշկական աղբյուրներին, փոխանցում է DW-ն:
Հայտարարության մեջ նշվում է կանանց, տղամարդկանց ու երեխաների մոտ լորձաթաղանթի ուժեղ գրգռման, սուր շնչառական անբավարարության եւ կենտրոնական նյարդային համակարգի խափանումների մասին:
ԱՀԿ տեղեկություններով՝ ապրիլի 7-ի գիշերը հարձակման հետեւանքով զոհվել է 70-ից ավելի մարդ, որոնք թաքնվել են Դումայի շենքերի նկուղներում: Նրանցից 43-ը մահացել է հատուկ թունավոր նյութերի ազդեցության հետեւանքով, նշված է հայտարարության մեջ:
Կազմակերպությունը խստորեն դատապարտել է ենթադրյալ քիմիական հարձակումը եւ պահանջել Արեւելյան Գուտայի շրջանին հումանիտար կազմակերպությունների անհապաղ ու անխոչընդոտ հասանելիություն: