Ֆրանսիայի նախագահ Էմանուել Մակրոնը դժգոհություն է հայտնել, երբ France 2-ի ցերեկային լուրերի թողարկման ժամանակ եթերում իր կնոջ՝ Բրիժիտի հասցեին ուղղված վիրավորական պաստառ է հայտնվել, հայտնում է Le Parisien-ը։

Պաստառը մի քանի վայրկյան երևացել է հոկտեմբերի 6-ին ֆրանսիացի դպրոցականների բողոքի ակցիաների մասին ռեպորտաժի ընթացքում։ Դրա վրա գրված էր կոպիտ արտահայտություն՝ ակնարկով Մակրոնի և Բրիժիտի հարաբերություններին, որը ապագա նախագահի երիտասարդ տարիներին նրա ուսուցչուհին էր։

Ֆրանսիացի դպրոցականների բողոքի ակցիաները շարունակվում են սեպտեմբերի վերջից։ Մասնակիցները պահանջում են ավելացնել դպրոցների ֆինանսավորումը, ուսումնական հաստատություններն ապահովել լրացուցիչ մանկավարժներով և կրթական համակարգում ավելի մեծ հավասարության հասնել։

Պաստառի՝ եթերում հայտնվելուց հետո France 2-ը քննադատության է ենթարկվել խմբագրական վերահսկողության անբավարար լինելու համար։

Le Parisien-ի տվյալներով՝ Մակրոնը դժգոհ է եղել ոչ միայն այդ պատկերի ցուցադրումից, այլև հեռուստաալիքի կողմից հրապարակային ներողության բացակայությունից։

France Télévisions-ի ազգային խմբագրության ղեկավար Ժյուլիեն Դյուպերրեն հայտարարել է, որ հեռուստաալիքը պատասխանատվություն չի կրում ցուցարարների ձեռքին գտնվող պաստառների բովանդակության համար։ Միևնույն ժամանակ նա ընդունել է, որ խմբագրությունը պարտավոր է վերահսկել այն պատկերները, որոնք ցույց է տալիս եթերում, հատկապես եթե դրանցում առկա են վիրավորական արտահայտություններ։

Միջադեպից հետո France Télévisions-ի տեղեկատվական ծառայության ղեկավարությունը խմբագրություններին հիշեցրել է այս պատասխանատվության մասին։