Երեւանում պետք է մերժվածներ չլինեն: Այս մասին այսօր՝ սեպտեմբերի 5-ին «Լույս» դաշինքի նախընտրական գլխավոր շտաբի բացման ժամանակ լրագրողների հետ զրույցում ասաց Երեւանի ավագանու ընտրություններում դաշինքի քաղաքապետի թեկնածու Արտակ Զեյնալյանը՝ պատասխանելով ՀՀԿ-ի աջակցության հնարավորության մասին հարցին:
«Երեւանում պետք է մերժվածներ չլինեն: Յուրաքանչյուրը, ով ունի ընտրական իրավունք, իրավունք ունի նաեւ որոշում կայացնելու, թե ում օգտին տա իր քվեն: Մենք իրականացրել ենք հեղափոխություն նաեւ մարդկանց հոգիներում, այն սիրո, հանդուրժողականության հեղափոխություն է, եւ մենք չենք տարբերակելու ոչ մեկին: Մենք չպետք է մերժենք որեւէ մեկին, անկախ նրանից, թե նրանք որքան ընտրազանգված ունեն»,- հայտարարեց Արտակ Զեյնալյանը:
Այնուամենայնիվ, Զեյնալյանի կարծիքով, ՀՀԿ-ն միասնական որոշում չի կայացնի եւ որեւէ մեկին չի սատարի Երեւանի ավագանու ընտրություններում:
«Լույս» դաշինքի քաղաքապետի թեկնածուն հայտնեց նաեւ, որ նախընտրական ծրագրի աշխատանքները գրեթե ավարտին են հասցվել: Վերջին շրջանում դաշինքի անդամները հանդիպումներ են ունենում մայրաքաղաքի համայնքների բնակիչների հետ, արձանագրում են խնդիրներ, որոնք տեղ են գտնելու ծրագրում եւ, Արտակ Զեյնալյանի հավաստմամբ, իրականացնելու են:
«Ծրագրային դրույթները կարող են կրկնվել բոլոր ուժերի մոտ: Ամենակարեւոր ուղերձը, որ մենք ուզում ենք հղել Երեւանին, այն է, որ ուզում ենք մայրաքաղաքը միավորել, դարձնել համայնք, որպեսզի երեւանցին, իրացնելով տեղական ինքնակառավարում իրականացնելու իր իրավունքը, նաեւ մեծ պատասխանատվություն ունենա, որպեսզի իրականացնի իր երազանքը»,- ասաց նա:
Հարցին, թե որ պաշտոնն է ավելի հոգեհարազատ՝ արդարադատության նախարարի, թե՞ քաղաքապետի, Արտակ Զեյնալյանը պատասխանեց. «Ե՛վ արդարադատության նախարարի պաշտոնը, ե՛ւ Երեւանի քաղաքապետի պաշտոնը հանրային ծառայություններ են: Երեւանցին ինչպես որոշի, ես այնտեղ կծառայեմ: Ես պատրաստ եմ ստանձնել Երեւանը կառավարելու, երեւանցիներին առաջնորդելու պատասխանատվությունը»:
