Իսրայելի ռազմական դատախազությունը մեղադրանք է առաջադրել Արևմտյան ափի հյուսիսում գտնվող Նաբլուսի շրջանից երկու պաղեստինցիների՝ Իսրայելի քաղաքացիների և զինծառայողների դեմ մի շարք հարձակումներ, դրանց թվում՝ զինծառայողի առևանգում և Իսրայելի ազգային անվտանգության նախարար Իտամար Բեն-Գվիրի սպանություն նախապատրաստելու համար։ Դրա մասին ասվում է ոստիկանության և Իսրայելի ընդհանուր անվտանգության ծառայության (Շին Բեթ) համատեղ հայտարարությունում։

Ինչպես գրում է The Times of Israel-ը, քննության վարկածով կասկածյալները զինված հարձակումների նախապատրաստությամբ սկսել են զբաղվել 2023 թվականի վերջին։ Նրանց, ըստ պնդումների, հավաքագրել են այլ մասնակիցների, անցել են հրաձգային պատրաստություն, քննարկել հարձակումների ծրագրերը և ձեռք բերել ինքնաձիգներ ու զինամթերք։

2024 թվականին կասկածյալներն, ըստ մեղադրանքի նյութերի, որոշել են սպանել Բեն-Գվիրին։ Նրանցից մեկը, ենթադրաբար, առաջարկել է կազմակերպել հարձակում, որպեսզի նախարարին ներգրավեն դեպքի վայր, ապա նրա դեմ մահափորձ կատարեն։

Ավելի ուշ նույն կասկածյալն, ըստ քննության տվյալների, առաջարկել է սպանության համար օգտագործել պայթուցիկ անօդաչու սարք։ Նա փորձել է նաև Չինաստանից համապատասխան դրոնի մասեր ձեռք բերել։

Բացի նախարարի դեմ մահափորձից, կասկածյալները, ինչպես նշվում է, ծրագրել են ավտոմեքենաների պայթեցումներ և անօդաչու սարքերի կիրառմամբ հարձակումներ Իսրայելի քաղաքացիների ու զինծառայողների դեմ։ Քննությունը նրանց վերագրում է նաև զանգվածային գնդակահարությունների և զինծառայողի առևանգման նախապատրաստում։

Ոստիկանությունն ու Շին Բեթը չեն բացահայտել մեղադրյալների անունները և չեն հայտնել, թե կոնկրետ երբ են նրանք ձերբակալվել։ Ըստ հայտարարության՝ նրանց կալանքի ժամկետները պարբերաբար երկարաձգվել են մինչև մեղադրանք առաջադրելը։ Նրանք կմնան կալանքի տակ մինչև դատական քննության ավարտը։

Բեն-Գվիրն առանձին հայտարարությունում այս գործն անվանել է իր սպանության նպատակով իրեն հայտնի 11-րդ դավադրությունը։