նախընտրելի դարձնելՇիրակի մարզի Սպանդարյան գյուղում ՕԵԿ-ական գործող գյուղապետ Վաղինակ Բաղդասարյանը, օգտվելով իրավապահ համակարգում ունեցած լծակներից, ճնշում է գործադրում գյուղապետի պաշտոնի համար թեկնածությունը առաջադրած ԲՀԿ-ական թեկնածուի վրա: Այս մասին NEWS.am-ի թղթակցի հետ զրույցում ասաց ԲՀԿ-ական գյուղապետի թեկնածու էդիկ Կուրղինյանը:
Նրա խոսքով, իր թիմակիցներին, իր կողքի մարդկանց ՕԵԿ-ական գյուղապետը ոստիկանության աշխատակիցների` միլպետի գլխավորությամբ, կանչում է գյուղապետարան, որը նախընտրական շտաբ են սարքել եւ պահանջում, որ ձայները պետք է տան գյուղապետ Վաղինակ Բաղդասարյանին: «Ժողովրդի մի մասը վախեցած է, մյուսը ոչ: Կոնկրետ ինձ չեն ճնշել, միայն առաջադրման օրը զգուշացրել են, որ խուլիգանություն, բան չլինի: Ի դեպ, ես ճիշտ է` առաջին անգամ եմ իմ թեկնածությունը առաջադրում, բայց գործող գյուղապետին 2 անգամ ես եմ գյուղապետ դարձրել, քանի որ ԲՀԿ-ն հզոր կուսակցություն է: Սակայն տեսնելով, որ գյուղին ոչ մի օգուտ չի տվել, հետեւաբար իմ թեկնածությունն եմ առաջադրել»,- ահազանգեց ԲՀԿ-ական էդիկ Կուրղինյանը:
NEWS.am-ը զրուցեց նաեւ Շիրակի մարզի Սպանդարյան գյուղի ՕԵԿ-ական գյուղապետ Վաղինակ Բաղդասարյանի հետ, ով հաստատեց, որ ինքը Արթիկի ոստիկանության պետ Տիգրան Պետրոսյանի ընկերն է: «Ինչո՞ւ սահմանափակում կա, որ մարդիկ մարդկանց հետ շփվեն: Ընկերներս չգա՞ն մեր տուն: Որեւիցե մեկը համայնքում չի կարող գալ ասել, թե ում տան ձայները` անկախ նրանից, թե ում կողմից են: Ես ընկերական մեծ շրջապատ ունեմ Հայաստանի Հանրապետությունով մեկ»,- մրցակցի մեղադրանքներին արձագանքեց գյուղապետը եւ ավելացրեց, որ վաղը կարողա է ԱԺ-ից, կառավարությունից կամ Ազգային անվտանգությունից մարդիկ գան հարցնեն, թե իրեն ո՞վ է անհանգստացրել:
«Իրավունք չունե՞ն, թե՞ ինչպես հասկանանք: Տիգրան Պետրոսյանը, ԱԺ պատգամավոր Մուշեղ Պետոյանն իմ ընկերներն են եւ գալիս են գյուղ հետաքրքրվում են իրենց ընկերոջով: Ի՞նչ է, վա՞տ է: Իմ ընկերներս էլ միլիցիայի աշխատողներ են: Տղաս համակարգում է աշխատում: Ես նախկին միլիցիայի աշխատող եմ եղել: Բոլոր միլիցիայի աշխատողները իմ ընկերներն են, չգա՞ն ինձնով անհանգստանան: Ո՞ւմ են ստիպել, ծեծել, ձերբակալել »,- հարցրեց գյուղապետը: Վերջինս նշեց, որ իր մրցակցին սատարելու համար ԲՀԿ-ական պաշտոնյաներ էլ են գալիս գյուղ, սակայն անուններ չտվեց:
