Եվրոպական միության կողմից ֆինանսավորվող կրթական նախագծերի շրջանակում 2012թ.  հոկտեմբերի 16-ին եւ 18-ին «Էրեբունի» պատմահնագիտական արգելոց-թանգարանում կանցկացվեն  մշակութային եւ հնագիտական ժառանգությանը  նվիրված  2 թեմատիկ  սեմինարներ` դպրոցական ուսուցիչների համար:  Դպրոցների  ուսուցիչներից ձեւավորված 1-ին լսարանը ներկայացնում են մայրաքաղաքի Արաբկիր եւ Կենտրոն վարչական շրջանների թիվ 29, 42, 54, 83, 148 եւ 149 ավագ դպրոցների 15 ուսուցիչները:

Հաշվի առնելով այն, որ ժամանակակից աշխարհում հանրակրթությունը եւս միտված է դառնալ բազմառարկայական եւ միջառարկայական, սեմինարները նպատակ ունեն աջակցել դպրոցում մշակութային ժառանգության մանկավարժության ներդրմանը: 

Սեմինարները կանդրադառնան  ժառանգության  հասկացություններին  եւ դպրոցական ուսուցչի դերին` ժառանգության  ճանաչմանն ուղղված գործողությունների համատեքստում: Միաժամանակ կմեկնաբանվի ժառանգության պահպանության օրենսդրական շրջանակը` ազգային եւ միջազգային մակարդակներում: «Հնագիտական ժառանգություն. Էրեբունի» թեմատիկ  սեմինարը  կկենտրոնանա Երեւանի բնօրրանի` Էրեբունի ամրոցի պատմությանը եւ պահպանության խնդիրների վրա` ուսուցիչներին առաջարկելով աշակերտի մեջ դպրոցական նստարանից սերմանել պատմական քաղաքի բնակիչ լինելու պատասխանատվությունը: Կազմակերպիչներն ակնկալում են արդյունավետ երկխոսություն` դպրոցի եւ ժառանգության պրոֆեսիանալների միջեւ` ի նպաստ ժառանգության մասին իրազեկության:

Թեմատիկ սեմինարները պատրաստվել են ԵՄ Արեւելյան գործընկերության «Մշակույթ» ծրագրի շրջանակում իրականացվող  «Տարածաշրջանային համագործակցություն հանուն մշակութային ժառանգության զարգացման» նախագծի շրջանակում` «ԻԿՕՄՕՍ/Հայաստան» Հ/Կ կողմից` ՀՀ Գիտության եւ կրթության նախարարության հետ սերտ համագործակցությամբ: «Էրեբունի» պատմահնագիտական արգելոց-թանգարանը նախագծի  մասնակցային գործընկերն է:  Նախագիծը ֆինանսավորվում է ԵՄ կողմից: «Տարածաշրջանային համագործակցություն հանուն մշակութային ժառանգության զարգացման» նախագիծը իրականացվում է Վրաստանում /ԻԿՕՄՕՍ/Վրաստան, գլխավոր գործընկեր/, Հայաստանում /ԻԿՕՄՕՍ/Հայաստան, գործընկեր/ եւ Ուկրաինայում /("Architectura I Prestizh", գործընկեր/: Հայաստանում նախագծի շնորհանդեսը տեղի է ունեցել 2012թ. հունիսի 15-ին` «Էրեբունի» պատմահնագիտական արգելոց-թանգարանում: