նախընտրելի դարձնել
Մալաթիա-Սեբաստիա համայնքի նախկին ղեկավար, ազատամարտիկ Վահան Զատիկյանի որդու` Սեդրակ Զատիկյանի սպանության մեջ որպես պատվիրատու մեղադրվող 33-ամյա Ստեփան Հակոբյանի դատավճիռը, ով դեկտեմբերի 9-ին Մալաթիա Սեբաստիա վարչական շրջանների ընդհանուր իարավասության դատարանի կողմից դատապարտվեց 15 տարվա ազատազրկման, հնարավոր է տուժող կողմը բողոքարկի: Այս մասին NEWS.am-ի թղթակցի հետ զրույցում ասաց Անդրանիկ Զատիկյանի քեռին՝ Մելս Հարությունյանը:
Նա նշեց, որ իրենք ցմահ ազատազրկում էին ակնկալում: Սակայն ավելի ուշ կարող են ասել՝ բողոքարկելո՞ւ են դատավճիռը, թե՝ ոչ: «Այս պահին հստակ չեմ կարող ասել, բայց չի բացառվում որ բողոքարկենք»,- ավելացրեց Մելս Հարությունյանը:
Ավելի վաղ, Անդրանիկ Զատիկյանի քեռին՝ Մելս Հարությունյանը, NEWS.am-ի թղթակցի հետ զրույցում հայտնել էր, որ Երեւանի Մալաթիա-Սեբաստիա համայնքի նախկին թաղապետ Վահան Զատիկյանի կրտսեր որդու՝ 31-ամյա Անդրանիկ Զատիկյանի մահը պատվիրվել է նրա սպանված եղբոր հետ միասին: Նշենք նաեւ, որ շաբաթներ շարունակ էլ Ստեփան Հակոբյանի գործով դատական նիստերը հետաձգվում էին նրա առողջական վիճակի պատճառով: Ավելին` Անդրանիկ Զատիկյանի հարազատները կասկածում են, որ Ստեփան Հակոբյանն ամենեւին էլ լուրջ առողջական խնդիրներ չունի եւ այդ ամենը պատված է, որ ազատազրկումը անցկացնի դատապարտյալների հիվանդանոցում:
Քրեակատարողական վարչության լրատվական ծառայությունից էլ տեղեկացանք, որ Ստեփան Հակոբյան գտնվում է դատապարտյալների հիվանդանոցում: Հակոբյանը բարդ վիրահատության է ենթարկվել եւ հիմա գտնվում է հետվիրահատական շրջանում, ապաքինվելուց հետո կտեղափոխվի «Նուբարաշեն» ՔԿՀ:
«Վիրահատությունը տեղի է ունեցել դատապարտյալների հիվանդանոցում: Դա մի քիչ անձնական է»,-ասել են ՔԿՎ-ից:
Հիշեցնենք, որ Անդրանիկ Զատիկյանի գործով ոստիկանությունից տեղեկացրել էին, որ ըստ դատաբժիշկների նշանակված փորձաքննության, մահացել է սրտի պսակաձեւ անոթներում արյան շրջանառության սուր խանգարումից` մեթադոնային եւ հաշիշային ինտոքսիկացիայի ֆոնի վրա: Փորձաքննությամբ նաեւ պարզվել է, որ Ա. Զատիկյանը կենդանության օրոք տառապել է թույլ արտահայտված ընդհանուր աթերոսկլերոզով, կորոնարոսկլերոզով, սրտամկանի ծանր սնուցախանգարումով, ինչն էլ մեթադոնային եւ հաշիշային ինտոքսիկացիայի պայմաններում հանգեցրել են մահվան: Փորձաքննությունից հետո քննություն սկսվեց, թե որտեղից են նրա ձեռքում հայտնվել թմրանյութը:
Ավելի վաղ տեղեկացրել էինք, որ Մալաթիա-Սեբաստիա վարչական շրջանի Մեծարենցի 58 հասցեի մոտ 2013-ի հունվարի 13-ին ժամը 7:00-ի սահմաններում հայտնաբերվել է 31-ամյա Անդրանիկ Վահանի Զատիկյանի դին: Վերջինս Մալաթիայի նախկին թաղապետ, վաղամեռիկ Վահան Զատիկյանի տղան է: Անդրանիկ Զատիկյանը հաշվառված է Մեծարենցի 58 հասցեում, սակայն բնակվում էր Նոյ թաղամասում: Դատաբժշկի նախնական եզրակացության համաձայն` դիակի վրա բռնության հետքեր չեն հայտնաբերվել: Անդրանիկ Զատիկյանի հայրն էլ` Վահան Զատիկյանը մահացել է 1999թ-ի հոկտեմբերի 7-ին: Պաշտոնական վարկածով վերջինս մահացել է սրտի կաթվածից: Իսկ Զատիկյանի ավագ որդին`Սեդրակ Զատիկյանը սպանվել էր 2006թ. հունիսի 22-ին Երեւանի Սեբաստիայի եւ Տիչինայի փողոցների խաչմերուկում, անհայտ անձը ԱԿ-74 տիպի ինքնաձիգից կրակահերթ է արձակել «Մերսեդես» մակնիշի ավտոմեքենայի վրա, որի հետեւանքով վարորդ, 31-ամյա Սեդրակ Վահանի Զատիկյանը վիրավորվել է եւ հիվանդանոցի ճանապարհին մահացել: Նույն վայրում կրակոցներից մահացել է անցորդ, 42-ամյա Կարինե Սարգսյանը:
