նախընտրելի դարձնել
Չինաստանում դատարանը նորածինների առեւտրի համար բժիշկ-մանկաբարձուհուն մահապատժի է դատապարտել:
Ինչպես հաղորդվում է, մեղադրյալ Չժան Շուսյան դատարանում խոստովանել է իր աշխատած հոսպիտալից նորածիններին առեւանգելու փաստը եւ նրանց վաճառքը:
Քրգործի նյութերի համաձայն՝ բժիշկը ծնողներին տեղեկացրել է, որ իրենց նորածին երեխաներն ի ծնե արատավոր են ու ստիպել է հրաժարվել նրանցից:
Չժան Շուսյայի գործի հետաքննության ընթացքում երեխաների ապօրինի վաճառքի ցանց է հայտնաբերվել, որի կենտրոնական դեմքը մանկաբարձուհին էր, հայտնում է rbc-ն՝ վկայակոչելով Associated Press-ը:
Քննության տվյալով, ամբաստանյալը երեխաներին վաճառել է մարդկանց առեւտրով զբաղվողներին, որոնք իրենց հերթին ավելի թանկ գնով են վաճառել: Այսպես, հուլիսին մանկաբարձուհին 21 600 յուան (3600 դոլար) է ստացել նորածին տղայի դիմաց, որին հետո վաճառել են 59 800 յուանով (9900 դոլար)՝ Չինաստանի Հենան նահանգում:
Նշվում է, որ կինը վաճառել է յոթ երեխաների, որոնց հետո վերավաճառել են ՉԺՀ-ի կենտրոնական եւ արեւելյան նահանգներում՝ 2011թ. նոյեմբերից 2013թ. հուլիս ընկած ժամանակահատվածում:
Ընդ որում՝ վաճառված նորածիններից վեցը վերադարձվել կամ փրկվել էին ոստիկանների շնորհիվ: Մի աղջնակ էլ, որից ինքնակամ հրաժարվել էին ծնողները եւ որը վաճառվել էր հազար յուանով (165 դոլար), 2013թ. ապրիլին մահացել է:
Գողացած երեխաներ գնող ընտանիքները ամենից հաճախ այդ քայլին դիմում են արու զավակ ունենալու համար, որն այնքան էլ հեշտ չէ սոցիալական խիստ՝ «մեկ ընտանիք, մեկ երեխա» քաղաքականության պայմաններում:
