նախընտրելի դարձնել
«Ոտքի Հայաստան» նախաձեռնության խորհրդի անդամ Անդրիաս Ղուկասյանը կարծում է, որ եթե ժողովուրդը իշխանությունների դեմ պայքարի դուրս գա, ապա եւ ոստիկանությունը, եւ բանակը կանցնեն ժողովրդի կողմը, եւ իշխանությունը կմնա մենակ: Այս մասին այսօր` օգոստոսի 21-ին, Հանրապետության հրապարակում «Ոտքի Հայաստանի» հրավիրած հանրահավաքին ասաց Անդրիաս Ղուկասյանը` կոչ անելով բոլորին Հանրապետության հրապարակում միանալ իրենց պայքարին:
«Եթե ժողովուրդը դուրս գա պայքարի, համոզված եմ, որ եւ ոստիկանությունը, եւ բանակը կմիանան ժողովրդին` մենակ թողնելով իշխանությանը: Մենք մնալու ենք այստեղ այնքան, մինչեւ որ հավաքագրենք անհրաժեշտ թվով մարդկանց Հանրապետության հրապարակը շրջափակելու համար»,-ասաց նա:
Ըստ նրա` իշխանությունների դեմ պայքարելու մեկ եղանակ կա` կառավարության եւ նախարարությունների աշխատելու հնարավորությունը սահմանափակելը:
«Արգելափակելով նախարարության եւ կառավարության շենքերը` իշխանությունը կկանգնի ճգնաժամի առաջ, մինչեւ դա ժողովուրդը չանի, ռեժիմը ճգնաժամ չի զգա»,-ասաց Անդրիաս Ղուկասյանը:
Ինչպես ավելի վաղ հաղորդել էր NEWS.am–ը, Հանրապետության հրապարակից բերման են ենթարկվել «Ոտքի, Հայաստան» նախաձեռնության անդամներ`Անդրիաս Ղուկասյանը, Դավիթ Հովհաննիսյանը, Սերգեյ Կյուրեղյանը եւ Անդրանիկ Մանուկյանը, ոստիկանի օրինական պահանջին չենթարկվելու պատճառաբանությամբ:
Մի քանի ժամ բերման ենթարկվածներն ազատ են արձակվել:
Հիշեցնենք, որ հուլիսի 27-ից Հանրապետության հրապարակում նստացույց են սկսել «Ոտքի Հայաստան» շարժման մասնակիցները: Նրանք պահանջում են չեղարկել էլեկտրաէներգիան 6,93 դրամով թանկացնելու որոշումը, ՀԾԿՀ անդամների հրաժարականները եւ ՀԷՑ–ի ազգայնացում։ Նախաձեռնությունը այսօր հանրահավք էր հրավիրել Հանրապետության հրապարակում։
