նախընտրելի դարձնելՀՀ ճանապարհային ոստիկանության օպերատիվ կառավարման կենտրոնի պետական հատուկ ծառայություն իրականացնող պաշտոնատար անձի կողմից բռնության գործադրմամբ զուգորդված պաշտոնեական լիազորություններն անցնելու վերաբերյալ քննվող քրեական գործի նախաքննությամբ ձեռք բերված փաստական տվյալների արդյունքում հիմնավորվել է, որ ոստիկանության հիշյալ ստորաբաժանման աշխատակից, ոստիկանության մայոր Արտավազդ Հարությունյանը, անցնելով պաշտոնեական լիազորությունները, բռնություն է կիրառել քաղաքացի Սասուն Թադեւոսյանի նկատմամբ:
ՀՔԾ-ից NEWS.am-ին հայտնում են, որ մասնավորապես՝ քրեական գործով իրականացված մի շարք քննչական եւ դատավարական գործողությունների արդյունքում հիմնավորվել է, որ 2016թ. մարտի 20-ին ՀՀ ճանապարհային ոստիկանության հատուկ պահպանվող տարածքում արգելադրված ավտոմեքենայի բեռնախցիկից գույքի դուրսբերումը ձգձգելու առիթով վարորդ Սասուն Թադեւոսյանի եւ ոստիկանության աշխատակիցների միջեւ ծագել է վիճաբանություն, որը շարունակվել է նաեւ ոստիկանության օպերատիվ կառավարման կենտրոնի վարչական շենքում:
Այդ ընթացքում՝ հատուկ միջոցներ գործադրելու (օգտագործելու) օրենքով նախատեսված պայմանների բացակայության, ինչպես նաեւ այն գործադրելու սահմանված կարգի ակնհայտ խախտմամբ, ՀՀ ճանապարհային ոստիկանության օպերատիվ կառավարման կենտրոնի պետական հատուկ ծառայություն իրականացնող պաշտոնատար անձ հանդիսացող Արտավազդ Հարությունյանը անհարկի դիմել է ոստիկանական հատուկ միջոց հանդիսացող ռետինե մահակի գործադրմանը, որով հերթապահ մասի ներսում բազմաթիվ հարվածներ է հասցրել քաղաքացի Ս. Թադեւոսյանի մարմնի տարբեր մասերին՝ պատճառելով մարմնական վնասվածքներ:
ՀՀ ճանապարհային ոստիկանության օպերատիվ կառավարման կենտրոնի պետական հատուկ ծառայություն իրականացնող պաշտոնատար անձ հանդիսացող Արտավազդ Հարությունյանին մեղադրանք է առաջադրվել ՀՀ քրեական օրենսգրքի 309-րդ հոդվածի 2-րդ մասով:
ՀՀ հատուկ քննչական ծառայությունում ավարտվել է հիշյալ քրեական գործի նախաքննությունը: Գործը մեղադրական եզրակացությամբ հանձնվել է դատավարական հսկողություն իրականացնող դատախազին՝ այն հաստատելու եւ դատարան ուղարկելու համար:
