Պաշտպանության նախկին փոխնախարար, Ազատամարտիկների դաշինքի անդամ, գեներալ  Գագիկ Մելքոնյանը ոչ մի խնդիր չի տեսնում, որ  պաշտպանության նախկին նախարար Սեյրան Օհանյանը պաշտոնանկությունից ամիսներ անց կարող է հանգրվանել ընդդիմադիր ճակատում եւ պայքար սկսել Սերժ Սարգսյանի իշխանության դեմ: Ավելին` կարծում է, որ նրան այդ հարցում պետք է սատարել:

Գագիկ Մելքոնյանը NEWS.am-ի հետ զրույցում ասաց, որ տեղյակ չէ  Սեյրան Օհանյանի քաղաքական ծրագրերից, չգիտի` քաղաքականություն կմտնի, թե ոչ եւ ինչ ձեւաչափով:

«Ես տեղյակ չեմ Սեյրան Օհանյանի ծրագրերից, բայց եթե Սեյրան Օհանյանն ասի, որ ինքը, իրոք, կանգնելու է ժողովրդի կողքին, մենք կստարենք»

Հարցին` արդյոք խոչընդոտ չէ այն, որ մինչեւ վերջերս  Սեյրան Օհանյանը Սերժ Սարգսյանի իշխանության կարեւորագույն ներկայաուցիչներից ու աջակիցներից մեկն էր, Մելքոնյանը պատասխանեց.

«Ոչ, մենք պիտի մեջքով կանգնենք անցյալը, դեմքով` ապագան: Մենք միշտ հակառակն ենք անում, դեմքով դեպի անցյալը, մեջքով` ապագան: Կապ չունի Սեյրան Օհանյանն ինչ է եղել անցյալում, պիտի մոռանանք, բոլորս պիտի մոռանանք: Եթե ուզում ենք արդյունքի հասնել, պիտի անցյալը թողնենք հետեւում: Իսկ մենք ընդհակառակը ասում ենք` էս մարդն էս ա եղել, էն ա եղել… ինչ որ եղել ա, եթե ուզում է կանգնի ժողովրդի կողքին, ուրեմն կսատարենք»,-ասաց նախկին փոխնախարարը:

Հիշեցնենք, որ Գագիկ Մելքոնյանը պաշտպանության փոխնախարարի պաշտոնից ազատվեց 2008 թվականին ՀՀ հիմնադիր նախագահ Լեւոն Տեր-Պետրոսյանի գլխավորած շարժմանն աջակցելու պատճառով:  Իսկ 2014 թվականին  մի խումբ ազատամարտիկների հետ միասին  ստեղծեցին Ազատամարտիկների դաշինքը եւ միացան ՀԱԿ-ԲՀԿ-Ժառանգություն  եռյակի բուրժուադեմոկրատական շարժմանը:

Նշենք, որ Ազգային ժողովում նախագահի նախկին ներկայացուցիչ Վիկտոր Դալլաքյանը երեկ հայտարարեց, որ իրենք համագործակցելու են Սեյրան Օհանյանի հետ, որը առաջիկա օրերին պատրաստվում է հայտարարել քաղաքականություն մտնելու իր մտադրության մասին: