նախընտրելի դարձնելՈստիկանության աշխատակիցների կողմից պաշտոնեական լիազորությունները չարաշահելու եւ անցնելու դեպքերի առթիվ ՀՀ հատուկ քննչական ծառայությունում քրեական գործ է հարուցվել Գյումրի քաղաքի բնակչուհի Ա.Գ.-ի հաղորդման հիման վրա:
ՀՔԾ-ից NEWS.am-ին հայտնում են, որ վերջինս Հատուկ քննչական ծառայությանը հաղորդում է տվել, որ 23.11.2016թ.-ին ոստիկանության Շիրակի մարզային վարչության Գյումրի քաղաքի Մուշի բաժնի աշխատակիցներն իր բնակարանը խուզարկելուց հետո, որդու կողմից գողություն կատարելու կասկածով իրեն ուղեկցել են ոստիկանության Մուշի բաժին եւ այնտեղ անօրինական պահել 14 ժամ:
Այդ ընթացքում բաժնի պետի տեղակալ Ա. Ղ.-ն, գողության մեջ մեղադրվող որդուն արգելանքից ազատելու պայմանով, պահանջել է նշված դեպքով հարուցված քրեական գործով տալ իրականությանը չհամապատասխանող ցուցմունքներ, որոնք այնուհետեւ արձանագրել է քննիչը:
Այնուհետեւ` ճանաչման ներկայացնելու քննչական գործողության ժամանակ, Ա. Ղ.-ն իր բջջային հեռախոսի միջոցով Ա. Գ.-ին ցույց է տվել անծանոթ տղամարդու նկար եւ վերջինիս պարտադրել լրացուցիչ սուտ ցուցմունք տալ այն մասին, թե, իբր, ճանաչել է նկարում պատկերված անձին, ով գողացված ապրանքներ է բերել իր բնակարան:
Ա. Գ.-ն վստահեցրել է, որ իրականությանը չհամապատասխանող այդ ցուցմունքները եւս հայտնել է որդուն կալանքից ազատելու խոստումների դիմաց:
Այսպիսով, պետական հատուկ ծառայություն իրականացնող պաշտոնատար անձանց` ոստիկանների կողմից պաշտոնեական լիազորությունները չարաշահելու եւ լիազորություններն անցնելու դեպքերի առթիվ ՀՀ քրեական օրենսգրքի 308-րդ եւ 309-րդ հոդվածի 1-ին մասերով հարուցվել է քրեական գործ:
Կատարվում է նախաքննություն:
