Երեւանի քաղաքապետարանի հանրակրթության վարչության նորանշանակ պետ Աննա Ստեփանյանը  NEWS.am-ի հետ զրույցում հայտարարել է, թե պայքարելու է դպրոցներում առկա արատավոր երեւույթների դեմ, սակայն  միաժամանակ նշել, որ  դպրոցներում  աշակերտների ծնողների ու ուսուցիչների ձայները ՀՀԿ-ի օգտին ցուցակագրելը արատավոր երեւույթ չի համարում:

«Ես ձայների ցուցակագրումը չեմ ընկալում, չեմ հասկանում՝ ինչ է դա, ավելի շատ ներկայացվում է, քան կա: Աշխատանքից հետո յուրաքանչյուրը իրավունք ունի զբաղվել այն գործունությամբ, ինչը ցանկանում է: Իսկ աշխատանքային ժամերին պարտաճանաչ աշխատում են»,-ասել է Աննա Ստեփանյանը:

Աննա Ստեփանյանը հորդորել է զինվել համբերությամբ եւ տեսնել՝ ինչ պայքար է մղելու:

«Ձեզ հետ միասին պետք է բարձրացնենք ուսուցչի  դերը, պետք է մեծարենք ուսուցիչներին, ոչ միայն փնովենք, նաեւ բարձրացնենք: Ես շատ բաների, արատավոր երեույթների դեմ կպայքարեմ ու  Դուք կտեսնեք: Զինվեք համբերությամբ»,-ասել է Աննա Ստեփանյանը:

Հիշեցնենք, որ Աննա Ստեփանյանի նշանակումից հետո հրապարակումներ եղան, որ  նա խորհրդարանական ընտրություններին կեղծ վկայականով դիտորդական առաքելություն է իրականացրել ընտրատեղամասում: Հիշեցնենք, որ մինչ նշանակումը նա  Սիամանոթյի անվան դպրոցի տնօրենն էր:

Նա վստահեցրել է, թե  քաղաքապետարանում նշված պաշտոնը վաստակել է ոչ թե ընտրական գործընթացներին ակտիվ մասնակցության,  այլ 25 տարվա մանկավարժական գործունեության շնորհիվ: