Սոցիալ-դեմոկրատ Հնչակյան կուսակցությունը հայտարարություն է տարածել, որում ոչ թե բանտեը լցնել միջին օղակի պաշտոնյաներով, այլ բարձրաստիճան պաշտոնյաներին, որոնք կոռուպցիայի իրական մեղավորներն են:

Հայտարարության մեջ ասվում է.

«Պարոնայք իշխանավորներ, բավական է կոռուպցիայի դեմ պայքարի անվան տակ բանտերը լցնեք միջին օղակի ոստիկաններով, բժիշկներով եւ մանր չինովնիկներով:

Ամենայն հավանականությամբ մամուլից շուտով կտեղեկանանք,որ Սոցիալական ապահովության պետական ծառայության ոլորտից , ձերբակալվել է հերթական չինովնիկը,  քանզի Ձեր իսկ  մատուցած տվյալներով, այնտեղ տարիներ շարունակ շուրջ 58 000 «մեռած հոգի»  ամեն ամիս կենսաթոշակ է ստացել, երկրին հասցնելով միլիոնավոր դոլարների վնաս: Չնայած այս ծանրագույն հանցագործությանը, վերոհիշյալ կառույցի ղեկավարը, Հանրապետական կուսակցության կարկառուն դեմքերից մեկը` պարոն Չիչիկով – Խաչիկյանը մինչ օրս ազատության մեջ է:

Մենք հասկանում ենք, որ «մեռած հոգիները» ոչ միայն խողովակ են հանդիսացել հանրության գումարները շորթելու, այլ դուք եւ ձեր խամաճիկները այս հոծ բազմությանը օգտագործել եք նաեւ ընտրակեղծիքներ ապահովելու համար: Այսպիսով, մեկ գնդակով մեկից երկու նապաստակ եք որսացել:

Հանրությանը հայտնի է նաեւ առողջապահության բնագավառում մոտ մեկ մլրդ դրամի հասնող չարաշահումների փաստը, իհարկե սա այն նվազագույնն է, որը արձանագրվել է: Լիարժեք ստուգման պայմաններում այն տասնապատիկ ավելի կլիներ:

Այստեղ  հայտնաբերված փաստերը կոծկելու, հասարակությանը շփոթության մեջ գցելու նպատակով, վերջերս երկու տարեց բժշկուհու 30 հազար դրամ վերցնելու կասկածանքով բանտախուց նետեցիք, չսպասելով դատաքննության արդյունքներին, իսկ պարոն Քուշկյանը  առ այսօր պաշտոնավարում է: Հիրավի, ձու գողացողին պատժում են, միլիոներ թալանողին հարգալից վերաբերվում:

ՍԴՀԿ Կենտրոնական վարչությունը փաստում է.  բավական է շարքային մասնագետներին բանտերը նետելով կոռուպցիայի դեմ պայքարի պատրանք ստեղծեք: Ժողովրդի համբերությունը սահման ունի:

Հանրապետությունում ծանր սոցիալական վիճակ է տիրում, հասարակության ցասումը կանխելու լավագույն ձեւերից մեկն ել խոշոր կոռուպցիոներների  հայտնաբերումն է եւ դատապարտումը:

Ինչպես Ձեզ հայտնի է` ձուկը գլխից է հոտում»: