Իրաքի իշխանությունները կիրակի կարգադրել են  անջատել Բաղդադում տեղադրված լուսադիոդային գովազդային վահանակներն այն բանից հետո, երբ հաքերին հաջողվել է պոռնոֆիլմ ցուցադրել դրանցից մեկի վրա, հայտնել են անվտանգության ուժերը՝ հայտարարելով կասկածյալի ձերբակալության մասին:

Շաբաթ երեկոյան մի տղամարդու հաջողվել է կառավարել Իրաքի մայրաքաղաքի կենտրոնում  Ուքբա բին Նաֆիյա հրապարակի խաչմերուկում տեղադրված գովազդային էկրանը, հայտնում է AFP-ն՝ վկայակոչելով անվտանգության ծառայության անանուն աղբյուրին:

«Հաքերը մի քանի րոպե պոռնոֆիլմ էր ցուցադրում, մինչև մենք կտրեցինք սնուցման մալուխը», - ասել է նա։

Սոցիալական ցանցերում տարածվել է տեսագրություն, որտեղ մեքենաներն անցնում են պոռնոֆիլմ ցուցադրող վահանակի կողքով։

«Այս անբարոյական տեսարաններն իշխանություններին հարկադրեցին Բաղդադում անջատել բոլոր գովազդային էկրանները, մինչ նրանք վերանայում են անվտանգության միջոցները», - պարզաբանել է  անվտանգության աշխատակիցը:

Ներքին գործերի նախարարությունը  հայտնել է նաև, որ կասկածյալը ձերբակալվել է:

Ըստ AFP-ի լուսանկարչի, մի քանի վահանակներ, որոնք սովորաբար ցուցադրում են  կենցաղային ապրանքների կամ քաղաքական թեկնածուների գովազդները ընտրություններից առաջ, անջատվել են կիրակի առավոտյան:

Իրաքը 2022 թվականին հայտարարել էր, որ պատրաստվում է արգելափակել պոռնոգրաֆիկ կայքերը, սակայն դրանցից շատերը հասանելի են մնացել։