Առնվազն 30 վաղածին երեխա է տարհանվել  Գազայի գլխավոր հիվանդանոցից և կտեղափոխվի Եգիպտոսի հիվանդանոցներ, հաղորդում է AP-ն՝ վկայակոչելով Գազայի հատվածի առողջապահության նախարարությանը:

Նախարարության խոսնակ Մեհաթ Աբասը գործակալության հետ հեռախոսազրույցում հաստատել է տարհանման փաստը։

Առողջապահության համաշխարհային կազմակերպության (ԱՀԿ) թիմը, որը շաբաթ օրը այցելել էր  Ալ-Շիֆա հիվանդանոց, հայտնել էր, որ 32 նորածին է եղել տասնյակ ծանր  հիվանդների թվում, որոնք արգելափակված են հիվանդանոցում, որտեղ իսրայելական ուժերը գործում են անցյալ շաբաթվանից:

Կիրակի ավելի վաղ ԱՀԿ թիմը նաև տեղեկացրել էր, որ 291 հիվանդ է մնացել  հիվանդանոցում՝  իսրայելական զորքերի կողմից հիվանդների  տարհանումից հետո։

Նրանց թվում եղել են  ծայրահեղ ծանր վիճակում գտնվող նորածիններ, ծանր վարակիչ վերքերով վնասվածքաբաններ և ողնաշարի վնասվածքներով հիվանդներ, որոնք ի վիճակի չեն շարժվել:

Ըստ ԱՀԿ-ի տվյալների, թիմը կարողացել է  ուսումնասիրել հիվանդանոցը մեկ ժամվա ընթացքում այն ​​բանից հետո, երբ շուրջ 2500 տեղահանված մարդիկ, շարժունակ հիվանդները և բժշկական անձնակազմը լքել են ընդարձակ համալիրը:

Հաղորդվում է, որ հիվանդների հետ մնացել է բուժանձնակազմի  25 անդամ։

ԱՀԿ-ն նաև հույս ունի հիվանդներին տարհանել հարավային Գազա, որտեղ նույնպես հիվանդանոցները ծանրաբեռնված են: