Դեկտեմբերի 23-ի գիշերը Մոսկվայի Մուկոմոլնի նրբանցքի բնակարաններից մեկում վիճաբանության ժամանակ 37-ամյա տղամարդը դանակահարել է 25-ամյա աղջկա։ Ստացած վնասվածքներից աղջիկը տեղում մահացել է։ Հարուցվել է քրեական գործ՝ սպանության հոդվածով (ՌԴ ՔՕ 105-րդ հոդվածի 1-ին մասով), հաղորդում է ՌԴ Քննչական կոմիտեի (ՌՔԿ) Մոսկվայի մամլո ծառայությունը։

Մամուլի հաղորդագրության մեջ նշվում է, որ վիճաբանությունը տեղի է ունեցել «անձնական թշնամանքի հողի վրա»։ Shot տելեգրամյան ալիքը հայտնում է, որ վիճաբանության ժամանակ աղջիկը փակվել է սենյակում, զանգահարել ընկերոջը և ասել, որ «իրեն սպանում են»։ Երբ ոստիկանները ժամանել են դեպքի վայր, հայտնաբերել են աղջկա դին։

Սպանությունից հետո, ըստ  ՌՔԿ-ի հաղորդագրության, տղամարդը դանակով մարմնական վնասվածքներ է հասցրել իրեն։ Նրան տեղափոխել են հիվանդանոց։  Shot-ը նշում է, որ նա խոստովանական ցուցմունք է տվել։

Ըստ մեդիա նախագծի, սպանվածի անունը Վլադա է եղել, նա Մոսկվա է եկել Կրասնոդարից և որոշ ժամանակ ապրել 37-ամյա Ալեքսեյի հետ, գրում է Коммерсант-ը։