Nissan-ը և Honda-ն կարող են իրենց դաշինքն ընդունել  Mitsubishi-ին: Ճապոնական ընկերությունների միջև դաշինքը կօգնի նրանց նվազեցնել ավտոմեքենաների ստեղծման ծախսերը և պայքարել չինական աճող ավտոարդյունաբերության դեմ, գրում է Nikkei Asia-ն՝ վկայակոչելով ինսայդերներին։ Nissan-ը, Honda-ն և Mitsubishi-ն միասին արտադրում են տարեկան ավելի քան ութ միլիոն ավտոմեքենա:

Mitsubishi Motors-ը, որի բաժնետոմսերի 34 տոկոսը պատկանում է Nissan-ին, կքննարկի Honda-ի և Nissan-ի հետ ռազմավարական համագործակցության մանրամասները, գրում է Motoru.ru-ն։ Ճապոնական ավտոմոբիլային երեք հսկաները մտադիր են սկսել ծրագրային ապահովման ստանդարտացումից, ասում են ինսայդերները: Սակայն նրանք կարող են ավելի հեռուն գնալ. օրակարգում է նաև բուն մեքենաների համատեղ մշակման հարցը։

Honda-ն և Nissan-ը համապարփակ համագործակցության մասին հայտարարեցին այս տարվա մարտին: Սա հետևել է նրան, որ  Nissan-ը կանոնավորապես կորցնում է շուկայի մասնաբաժինը ԱՄՆ-ում և Չինաստանում, որոնք նրա ամենակարևոր տարածաշրջաններն են, որոնց բաժին է ընկնում համաշխարհային վաճառքի մոտավորապես կեսը: Հունիսին Nissan-ը նույնիսկ ստիպված էր փակել Չինաստանի Չանչժոու քաղաքում գտնվող գործարանը:

Honda-ն նույնպես դժվարություններ ունի Չինաստանում։ Անցյալ շաբաթ հաղորդվեց, որ այն կփակի մի քանի գծեր՝ մոտ մեկ երրորդով կրճատելով տեղական արտադրությունը:

Պատճառները Չինաստանում կատաղի մրցակցությունն է տեղական ապրանքանիշերի, ինչպես նաև Tesla-ի կողմից, որը էլեկտրական մեքենաներ է արտադրում Շանհայի գիգաֆաբրիկաներից մեկում: Ճապոնացիները, ինչպես ասում են փորձագետները, ժամանակ չունեցան հարմարվելու Չինաստանում «կանաչ» շարժունակության շրջադարձին, ինչը հանգեցրեց ներքին այրման շարժիչներով մեքենաների պահանջարկի կտրուկ անկմանը աշխարհի ամենամեծ ավտոմոբիլային շուկայում: